WHOનો દાવો, કોરોના અંગે અમે સૌથી પહેલા એલર્ટ આપ્યું હતું ચીને નહીં

જીનીવાઃ વિશ્વ આરોગ્ય સંસ્થા(WHO)એ કોરોના મહામારીને લઈને હવે ખૂબ મોટો દાવો કર્યો છે. WHOએ દાવો કર્યો છે કે કોરોના મહામારીના પ્રાથમિક તબક્કામાં ચીને કોઈ એલર્ટ આપ્યું નહોતું. પરંતુ વુહાનમાં વધી રહેલા ન્યુમોનિયાના કેસને લઈને ચીમાં WHOની ઓફિસ તરફથી ચેતવણી જાહેર કરવામાં આવી હતી. મહત્વનું છે કે સંયુક્ત રાષ્ટ્રની આરોગ્ય સંસ્થા પર અમેરિકાના પ્રમુખ ડોનાલ્ડ ટ્રમ્પ આરોપ મૂકતા રહ્યા છે કે દુનિયાને કોરોના મહામારી અંગે પ્રાથમિક તબક્કે એલર્ટ આપવામાં નિષ્ફળ રહ્યા છે અને તેમણે આ મામલે ચીનને છાવરવાનું કામ કર્યું છે. જોકે WHOએ ફરી એકવાર આ આરોપને નકાર્યા હતા.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

મહામારી અંગે WHOના પ્રાથમિક વલણની ખૂબ ટીકા થયા બાદ સંસ્થાએ 9 એપ્રિલના રોજ પહેલી ટાઈમલાઈન બહાર પાડી હતી. આ ક્રોનોલોજીમાં WHOએ એટલું જ કહ્યું હતું કે હુબેઈ પ્રાંતના વુહાન મ્યુનિસિપલ હેલ્થ કમિશનરે 31 ડિસેમ્બરે નિમોનિયા અંગે જાણકારી આપી હતી. જોકે એ સ્પષ્ટ નહોતું કરવામાં આવ્યું કે આ સૂચના ચીની અધિકારીઓએ આપી હતી કે પછી કોઈ અન્ય સ્તોત્ર તરફથી મળી હતી.

જોકે WHO દ્વારા હાલમાં જાહેર કરવામાં આવેલ એક નવા નિવેદનમાં જણાવવામાં આવ્યા મુજબ સ્પષ્ટ થાય છે કે ચીનમાં WHOના કાર્યાલય દ્વારા 31 ડિસેમ્બરે વાયરલ ન્યુમોનિયાના કેસ અંગે જાણકારી આપવામાં આવી હતી. તો આ દિવસે જ WHOની એપીડેમિક ઇન્ફોર્મેશન સર્વિસ દ્વારા અમેરિકાની ઇન્ટરનેશનલ એપિડેમિયોલોજિકલ સર્વેલન્સ નેટવર્ક પ્રોમેડ દ્વારા જાહેર કરવામાં આવેલ એક ન્યુઝ રિપોર્ટને પણ આધાર બનાવવામાં આવ્યો હતો જેમાં દાવો કરવામાં આવ્યો હતો કે વુહાનમાં ન્યુમોનિયાને કેટલાક ગંભીર અને અજાણ્યા પ્રકારના કેસ જોવા મળ્યા છે.

જે બાદ WHOએ ચીન પાસેથી 1 જાન્યુઆરી અને 2 જાન્યુઆરીના દિવસે આ મામલે માહિતી માગી હતી જે તેમને 3 જાન્યુઆરીએ આપવામાં આવી હતી. WHOના હેલ્થ ઇમર્જન્સી સર્વિસના નિર્દેશક મિશેલ રિયાને કહ્યું કે અમે ચીન પાસે આ માહિતી માગી તે પછી તેમના અધિકારીઓએ તરત જ WHOનો સંપર્ક સાધ્યો હતો. કોઈપણ દેશ પાસે આવી સ્થિતિમાં દાવાની સત્યતા ચકારવા માટે 24-48 કલાકનો સમય હોય છે.