Weibo પરથી પીએમ મોદીની એક્ઝિટ, ચીનને આપ્યો સીધો સંદેશ

નવી દિલ્હી: ભારત સરકારે જે 59 ચાઈનીઝ એપ્સને પ્રતિબંધિત કરી છે, તેમાંથી એક Weibo પર પીએમ મોદીનું સત્તાવાર અકાઉન્ટ છે. બુધવારે લોકો એ સમયે આશ્ચર્યમાં મૂકાઈ ગયા જ્યારે અકાઉન્ટ પરથી ફોટો, પોસ્ટ્સ અને કોમેન્ટ્સ ગાયબ થઈ ગયા. ઘણા લોકોએ અંદાજ લગાવ્યો કે, ચીને જવાબી કાર્યવાહી કરતા Weibo પાસે આ કરાવ્યું, જોકે તે સાચું નથી. હકીકતમાં પીએમ મોદીએ ચાઈનીઝ એપ પર પ્રતિબંધ મૂકાયા બાદ નક્કી કર્યું કે, તેઓ Weiboમાંથી એક્ઝિટ કરશે. તે પછી તેમના અકાઉન્ટને ડિલીટ કરવાની પ્રક્રિયા શરૂ થઈ. વીઆઈપી અકાઉન્ટ્સ માટે Weibo છોડવું ઘણી જટિલ પ્રક્રિયા છે, એટલે સત્તાવાર રીતે આખી પ્રોસેસ શરૂ કરવામાં આવી.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial

115માંથી 113 પોસ્ટ્સ થઈ ગઈ હતી ડિલીટ…
ચીન તરફથી બેઝિક મંજૂરી આપવામાં પણ મોડું કરવામાં આવ્યું. પીએમ મોદીના Weibo અકાઉન્ટ પર કુલ 115 પોસ્ટસ હતી. નક્કી થયું કે, તેને મેન્યુઅલી ડિલીટ કરવામાં આવશે. ઘણા પ્રયાસો બાદ 113 પોસ્ટ્સ ડિલીટ કરી દેવાઈ. બે પોસ્ટ્સ હજુ પણ રહી ગઈ હતી, જેમાં પ્રેસિડન્ટ શી જિનપિંગની સાથે પીએમ મોદીની તસવીરો હતી. Weibo પર ચીનના પ્રેસિડન્ટવાળી તસવીર હટાવવી મુશ્કેલ છે. આખરે કોઈ રીતે તેને પણ હટાવાઈ. હવે, પીએમ મોદીના અકાઉન્ટ પર કંઈ નથી. જોકે, જ્યારે પોસ્ટ્સ ડિલીટ કરવાની શરૂ કરાઈ ત્યારે પીએમ મોદીના 2,44,000 ફોલોવર્સ હતા.

ચીનની આવી હરકતને પગલે લાગ્યો પ્રતિબંધ
કેટલાક દિવસ પહેલા, ચીનની જાણીતી એપ WeChatથી ભારતીય એમ્બેસીના સત્તાવાર અકાઉન્ટ પરથી 3 ભારતીય સ્ટેટમેન્ટ ડિલીટ કરી દેવાયા હતા. તેમાંથી એક વડાપ્રધાન મોદીનું સ્ટેટમેન્ટ પણ હતું. ચીનની આવી હરકતો અને તેની એપ્સને લઈને સિક્યોરિટી અને પ્રાઈવસી સાથે જોડાયેલી ચિંતાઓને જોતા ભારત સરકારે સોમવારે TikTok, Weibo, Helo, WeChat જેવી ચાઈનીઝ એપ્સ પર પ્રતિબંધ લગાવી દીધો હતો. હવે, આ એપ્સ ગુગલ પ્લેસ સ્ટોર અને એપ્પલ પ્લે સ્ટોર પરથી હટાવી દેવાઈ છે.

LAC પર ચીને ઊભો કર્યો તણાવ
ભારત અને ચીન વચ્ચે લાઈન ઓફ એક્ચુઅલ કન્ટ્રોલના વેસ્ટર્ન સેક્ટરમાં ભારે તણાવ ઊભો થયો છે. બંને દેશોની સેનાઓ પૂર્વ લદાખની ગલવાન ઘાટીમાં 15-16 જૂને સામ-સામે આવી ગઈ હતી. હિંસક અથડામણમાં ભારતના 20 જવાન શહીદ થયા હતા. ચીને પોતાના કેટલા સૈનિક માર્યા ગયા તે જણાવ્યું નથી. પેન્ગોંગ ત્સોમાં પણ ચીનની સરહદે ઘુસણખોરી કરી છે અને ડેપસાંગ પ્લેન્સમાં પણ તેના સૈનિક ઉપસ્થિત છે. બંને દેશોની વચ્ચે સીનિયર મિલિટ્રી કમાન્ડર લેવલની વાતચીત થઈ છે, પરંતુ કોઈ નક્કર સંમતિ ઊભી થઈ શકી નથી.