પેટ્રોલ પંપના કર્મચારીના દીકરાએ પાસ કરી UPSCની પરીક્ષા, જાણો સફળતાનો મંત્ર

UPSCના ઈતિહાસમાં સૌથી ઓછી ઉંમરે IAS થયા હોય તે પૈકી પ્રદીપ સિંહે વર્ષ 2018માં 93 રેન્ક સાથે આ પરીક્ષા પાસ કરી હતી. પ્રદીપ સિંહ અતિસામાન્ય પરિવારમાંથી આવે છે અને તેમના પિતા પેટ્રોલ પંપ પર કામ કરે છે. UPSCની પરીક્ષા આપવાનો નિર્ણય પ્રદીપ સિંહનો પોતાનો હતો પણ પરિવાર તરફથી હંમેશાં UPSCની પરીક્ષા પાસ કરવા માટેની પ્રેરણા મળતી રહી.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

UPSCના કોચિંગ માટે જ્યારે પ્રદીપ સિંહને ઈન્દોરથી દિલ્હી જવાનું થયું ત્યારે દિલ્હીના કોચિંગ અને ત્યાં રહેવાનો ખર્ચો ઉઠાવવા માટે પ્રદીપ સિંહને ઘર વેચવું પડ્યું હતું. પ્રદીપ સિંહે જણાવ્યું કે પૈસાની સમસ્યા હોવા છતાં પણ પિતાએ ક્યારેય મને કોઈ તકલીફ પડવા નથી દીધી. ભણવા પાછળ જે કોઈ ખર્ચો થયો તે માટે પણ પિતાએ ક્યારેય ના પાડી નથી. પ્રદીપ સિંહે જણાવ્યું કે હું હંમેશાં મારા પિતાનો આ સંઘર્ષ અનુભવતો રહ્યો.

પ્રદીપ સિંહે જ્યારે UPSCની પરીક્ષાની તૈયારી શરૂ કરી ત્યારે મનમાં એક વાત નક્કી કરી લીધી હતી કે જલદી આ પરીક્ષા પાસ કરવાની છે. એક વખત UPSCની પરીક્ષા આપવાનો મતલબ છે ઓછામાં ઓછો 2 વર્ષનો સમય. પિતાની આર્થિક સ્થિતિને ધ્યાનમાં રાખતા પ્રદીપ સિંહ જલદી UPSCની પરીક્ષા પાસ કરવા માગતા હતા. બહારની દુનિયા ભૂલીને માત્ર ભણવામાં ધ્યાન આપ્યું અને UPSCની પરીક્ષા પાસ કરી.

UPSCની પરીક્ષા પાસ કરવા માટે પ્રદીપ સિંહ એ પ્રકારે સલાહ આપતા કહે છે કે કોઈના દબાણમાં તૈયારી કરવી જોઈએ નહીં કારણકે અંદરથી જે પ્રેરણા મળે તે કામ આવે છે. સૌપ્રથમ પોતાનું લક્ષ્ય નક્કી કરો અને પછી તે પૂરું કરવામાં લાગી જાઓ, મહેનત કરો. રસ્તામાં કોઈપણ અડચણ આવે તો રોકાશો નહીં. સાચા દિલથી કરવામાં આવેલા પ્રયાસોથી કશું પણ શક્ય છે.