ચીને સ્વીકાર્યું, ભારતમાં TikTok પર પ્રતિબંધથી થશે અબજો ડૉલરનું નુકસાન

બેઈજિંગ : પૂર્વીય લદ્દાખમાં સરહદ પર તણાવ થયા બાદ ભારતે ચીનની 59 એપ્લિકેશન્સને પ્રતિબંધિત કરી દીધી. આ પગલાંથી બોખલાયેલું ચીન ભારતને પરિણામોની ધમકી આપતું રહ્યું. તેણે ત્યાં સુધી કહી દીધું કે, આનાથી ચીનની અર્થવ્યવસ્થા પર કોઈ અસર નહીં પડે. જોકે, હવે તેણે માની લીધું છે કે, ભારતમાં પ્રતિબંધિત થવાને કારણે TikTok એપની પેરેન્ટ કંપનીને અબજો ડૉલર્સનું નુકસાન થઈ શકે છે.

‘6 અબજ ડૉલરનું થઈ શકે છે નુકસાન’

ચીનના પ્રોપગેન્ડા અખબાર ગ્લોબલ ટાઈમ્સે ટ્વીટ કર્યું કે, ગત મહિને લદ્દાખમાં સરહદ પર ટક્કર બાદ ભારત સરકાર દ્વારા 59 ચીની એપ બેન કરવાથી TikTokની પેરેન્ટ કંપની ByteDanceને 6 અબજ ડૉલરનું નુકસાન થઈ શકે છે. માત્ર એક એપ બેન થવાથી જો આટલા નુકસાનનું અનુમાન લગાવાઈ રહ્યું છે તો 59 એપ બેન થવાથી ચીનને કેટલો આર્થિક ઝટકો વાગશે તે સમજી શકાય છે.

ચીનનું મોટું માર્કેટ રહ્યું છે ભારત

ગ્લોબલ ટાઈમ્સ ભારતના નિર્ણય પર પ્રહારો કરી રહ્યું છે. તેણે કહ્યું કે, ભારતમાં ચાઈનીઝ પ્રોડક્ટ કરવાથી ભારતની જ અર્થવ્યવસ્થા અસર થશે, ચીન પર નહીં. જોકે, તેણે માન્યું છે કે, ચીની કંપનીઓ અને રોકાણકારો માટે ભારત એક મોટું માર્કેટ રહ્યું છે જેના પર છેલ્લા ત્રણ વર્ષથી તેની નજર રહી છે. આવામાં ભારતના પ્રતિકૂળ પગલાંની અસર ચીનની કંપનીઓ પર પણ પડશે તે નક્કી છે.

આ કારણે ભારત બેનથી ચીનને ડર

ડિજિટલ ઈકોનૉમી પર નજર રાખનારા નિષ્ણાતોનું માનવું છે કે, આ ચાઈનીઝ કંપનીઓ માટે ચિંતાની સૌથી મોટી વાત એ છે કે, હવે ભારતના જ રસ્તે દુનિયાના અન્ય દેશો પર ચાલી શકે છે. અમેરિકન કંપનીઓ ગૂગલ અને ફેસબુકને બાદ કરતા ભારત અને દક્ષિણ પૂર્વ એશિયાના કેટલાક દેશો એવા બજાર હતા જ્યાં ચાઈનીઝ કંપનીઓ પોતાના દેશ ઉપરાંત સફળતા માટે દાવ લગાવી રહી હતી. ચીનના વિકસિત થયા બાદ આ કંપનીઓએ અન્ય દેશોમાં રોકાણ કર્યું અથવા સર્વિસ શરૂ કરી.

પગ પસારી ચૂક્યું હતું ટિકટૉક

એક અંદાજ અનુસાર ભારતમાં 2019માં ટૉપ 200 એપમાં 38 ટકા ચીનની છે. ચાઈનીઝ એપ ભારતમાં વિકસિત એપના 41 ટકાના આંકડાથી થોડી જ પાછળ હતી. 2018માં ચાઈનીઝ એપ્સ ભારતથી આગળ હતી. ભારતમાં 2019માં ભારતીય લોકોએ 5.5 અબજ કલાક ટિકટૉક પર વિતાવ્યા હતા. 2018ની તુલનામાં આ આશરે 5 ગણો વધુ સમય છે. આ ટિકટૉકની મૂળ કંપની ByteDance માટે અત્યંત મહત્વનું છે જે ટૂંક સમયમાં જ IPO લાવવા જઈ રહી છે. બાઈટડાન્સ પાસે જ Helo એપ છે જે દુનિયાનું સૌથી કિંમતી સ્ટાર્ટઅપ (100 અબજ ડૉલર) છે.