TikTok સરકારે મૂકેલા પ્રતિબંધને કોર્ટમાં પડકારવાની તૈયારીમાં!

પવન બુરુગુલા/આનંદી ચંદ્રશેખર, મુંબઈ: સરકારે મૂકેલા ઓચિંતા પ્રતિબંધ સામે ચાઈનીઝ વિડીયો શેરિંગ એપ TikTok કોર્ટનો દરવાજો ખટખટાવે તેવી શક્યતા છે. આ બાબત સાથે સંકળાયેલા બે વકીલોએ આ વાત જણાવી છે. પ્રાપ્ત વિગતો અનુસાર, કંપનીએ મુંબઈ સ્થિત લૉ ફર્મ સાથે સરકારે મૂકેલા પ્રતિબંધને કોર્ટમાં કઈ રીતે પડકારી શકાય તે અંગે વાતચીત પણ કરી છે.

આ મામલે TikTok દ્વારા કંઈપણ કહેવાનો સ્પષ્ટ ઈનકાર કરી દેવાયો હતો.

ચીનની કંપની ByteDance TikTokની માલિકી ધરાવે છે. ભારત સરકારે સોમવારે 59 ચાઈનીઝ એપ્સ પર પ્રતિબંધ મૂકી દીધો હતો. તેમના પર ભારતીય યુઝર્સનો ડેટા ચોરી દેશ બહાર આવેલા સર્વરમાં તેને ટ્રાન્સફર કરવાનો આરોપ મૂકવામાં આવ્યો છે.

પોતે યુઝરના ડેટાનો કોઈ મિસયુઝ નથી કરતી તેવા દાવા સાથે TikTok સરકારના પ્રતિનિધિઓ સાથે સોમવારે મુલાકાત કરવા માટે તૈયારી કરી રહી છે. સરકાર તેનો શું પ્રતિભાવ આપે છે તે જોયા બાદ કંપની મામલાને કોર્ટમાં લઈ જઈ શકે છે. સરકારે ચાઈનીઝ એપ્સ પર પ્રતિબંધ મૂકતા પહેલા કાયદા અનુસાર યોગ્ય પ્રક્રિયા અનુસરી છે કે નહીં તેની પણ ચર્ચા ટીકટોકે મુંબઈની લૉ ફર્મ સાથે કરી હતી.

પ્રતિબંધ મૂકતા પહેલા સરકારે કંપનીને કંઈ નહોતું પૂછ્યું તેવી દલીલ પણ TikTok કરી શકે છે. જોકે, તેમના પર સરકારે જે આક્ષેપ કર્યા છે તે ખૂબ જ ગંભીર છે, અને તે રાષ્ટ્રની સુરક્ષા સાથે સીધા સંકળાયેલા છે. ભૂતકાળમાં સરકારે સુરક્ષા માટે લીધેલા નિર્ણય પર કોર્ટે દખલગીરી કરવાનો ઈનકાર કરી દીધો હોય તેવા કિસ્સા પણ બની ચૂક્યા છે.