ભારતમાં TikTok અને Helo એપ થઈ ‘બંધ’, એપ ઓપન કરતા દેખાઈ રહી છે આવી નોટિસ

નવી દિલ્હીઃ ભારત સરકારે સોમવારે TikTok સહિતની 59 ચાઈનીસ એપ પર પ્રતિબંધ મૂકવાની જાહેરાત કરી હતી. આજે સવારથી જ ગૂગલ પ્લે સ્ટોર અને એપ સ્ટોરથી આ એપ્સને દૂર કરી દેવામાં આવી હતી. સવાર સુધી TikTokની એપ્લિકેશનમાં વિડીયો દેખાતા હતા પરંતુ બપોર પછી તેમાં જૂના વિડીયો પણ દેખાતા બંધ થઈ ગયા અને એક નોટિસ જોવા મળી રહી છે.

ઉલ્લેખનીય છે કે આ પહેલા ભારતમાં જ્યારે TikTok પર બેન મૂકવામાં આવ્યો હતો ત્યારે યૂઝર્સના સ્માર્ટફોનમાં પહેલાથી ઈન્સ્ટોલ્ડ એપ કામ કરી રહી હતી પરંતુ આ વખતે સરકારે ટેલિકોમ કંપનીઓ અને ઈન્ટરનેટ સર્વિસ પ્રોવાઈડર્સ દ્વારા તેને પણ બ્લો કરાવી દીધી છે.

જ્યારે પણ હવે TikTok યૂઝર્સ એપ ઓપન કરી રહ્યા છે તો તેમને એક નોટિસ દેખાઈ રહી છે. તેમાં લખવામાં આવ્યું છે કે પ્રિય ગ્રાહ, અમે ભારત સરકાર દ્વારા 59 એપ્સને બ્લોક કરવાના નિર્ણયનું પાલન કરી રહ્યા છીએ. તમામ યૂઝર્સની પ્રાઈવસી અને સિક્ટોરિટી સુનિશ્ચિત કરવી અમારી પહેલી પ્રાથમિકતા છે.

આવી જ રીતે TikTokની જ સાથી કંપની Helo પર પણ પ્રતિબંધ મૂકવામાં આવ્યો છે. હેલોની એપ્લિકેશન ઓપન કરતા પણ આવો જ મેસેજ દેખાઈ રહ્યો છે. એટલે કે તેના યૂઝર્સ હવે સરકારના આગામી નિર્ણય સુધી આ એપ્લિકેશન્સનો ઉપયોગ નહીં કરી શકે.