અમદાવાદઃ મહિલા PSIએ બળાત્કારના આરોપી પાસેથી 35 લાખ માગ્યા

અમદાવાદઃ શહેરના પશ્ચિમ મહિલા પોલીસ સ્ટેશનમાં ફરજ બજાવતા મહિલા PSI શ્વેતા જાડેજા સામે અમદાવાદ ક્રાઈમ બ્રાન્ચમાં ખંડણી માંગી હોવાની ફરિયાદ નોંધાઈ છે. મહિલા PSIએ બળાત્કાર કેસના આરોપી પાસેથી 35 લાખ રૂપિયાની માંગણી કરી હતી. PSIએ તપાસ દરમિયાન 20 લાખ રૂપિયા પડાવ્યા હોવાનું સામે આવ્યું છે.

શ્વેતા જાડેજા 2017ની બેન્ચમાં પીએસઆઈ તરીકે ગુજરાત પોલીસમાં જોડાયા હતા. તેઓ છેલ્લાં ઘણાં સમયથી મહિલા ક્રાઇમ બ્રાંચના પશ્ચિમ મહિલા પોલીસ સ્ટેશનમાં ફરજ બજાવી રહ્યા હતા. આ સમય દરમિયાન જાન્યુઆરીમાં મહિલા PSI શ્વેતા જાડેજાને એક હાઈપ્રોફાઈલ કેસની તપાસ સોંપવામા આવી હતી. બે-બે બળાત્કાર કેસની તપાસના આરોપીને મહિલા PSI શ્વેતા જાડેજાએ પોલીસ સ્ટેશન બોલાવી કાયદકીય ધાકધમકી આપી હતી. પાસા ન કરાવવા હોય તો પહેલા 20 લાખની માંગણી કરી હતી. આરોપીએ 20 લાખ રૂપિયા આંગડિયા મારફતે ચૂકવ્યા હતા. ત્યાર બાદ ફરી એક વખત મહિલા પીએસઆઈએ 15 લાખની માંગણી કરી હતી.

વારંવાર લાખો રૂપિયાના માંગણી થતી હોવાથી આરોપીએ ઉચ્ચ અધિકારીની ભલામણ કરીને મહિલા PSI શ્વેતા જાડેજા સામે ક્રાઇમ બ્રાંચમાં ફરિયાદ કરી હતી. જેના આધારે ક્રાઇમ બ્રાંચે ગુરુવારે ફરિયાદ નોંધી તપાસ અમદાવાદ SOGને સોંપવામાં આવી હતી. હાલ એસઓસીએ મહિલા પીએસઆઈ શ્વેતાની અટકાયત કરીને વધુ તપાસ હાથ ધરી છે.