ભારત-ચીનના તણાવ વચ્ચે PM મોદીનું મોટું સરપ્રાઈઝ, અચાનક જ લદ્દાખ પહોંચ્યા

સરહદ પર ભારત અને ચીન વચ્ચેના તણાવ વચ્ચે વડાપ્રધાન નરેન્દ્ર મોદીએ આજે મોટું સરપ્રાઈઝ આપ્યું છે. દેશના જવાનોને પ્રોત્સાહિત કરવા અને ગ્રાઉન્ડ સિચુએશનનું નિરીક્ષણ કરવા માટે મોદી આજે સવારે અચાનક જ લદ્દાખ પહોંચ્યા હતા. અમે તમને પીએમ મોદીની લદ્દાખ મુલાકાતની તસવીરો દર્શાવી રહ્યા છે. તસવીરોમાં વડાપ્રધાન મોદી અને સીડીએસ બિપિન રાવત ખુરશી પર બેઠા જોવા મળે છે અને સેનાના જવાન તેમની સામે બેઠા છે.

સેનાના અધિકારીઓએ અહીંની વર્તમાન પરિસ્થિતિ અંગે વડાપ્રધાનને માહિતગાર કર્યા હતા. તમને જણાવી દઈએ કે મોદી સવારના સમયમાં લદ્દાખમાં જે જગ્યાએ પહોંચ્યા હતા તે સ્થળનું નામ નીમું છે. જ્યાં તેઓએ આર્મી, એરફોર્સ અને ITBPના જવાનો સાથે વાતચીત કરી હતી. આ સ્થળ બોર્ડરનું ફોરવર્ડ લોકેશન છે જે 11000 ફૂટની ઊંચાઈએ સ્થિત છે.

મળતી માહિતી પ્રમાણે પીએમ મોદી ગલવાનમાં હિંસક અથડામણમાં ઘાયલ થયેલા સૈનિકોની મુલાકાત પણ લઈ શકે છે. માનવામાં આવે છે કે વડાપ્રધાનની લદ્દાખ મુલાકાત ચીન માટે એક મજબૂત સંદેશ છે. વડાપ્રધાન અચાનક લેહ પહોંચ્યા અને સ્પષ્ટ કર્યું કે આખો દેશ જવાનોની સાથે છે અને સરહદ પરની કોઈપણ પરિસ્થિતિને પહોંચી વળવા સેનાને તમામ છૂટછાટો આપી છે.