વડોદરામાં MGVCLના 3 યુનિટના 3500 કર્મચારી સામુહિક રજા પર ઉતર્યા

વડોદરા: મધ્ય ગુજરાત વીજ કંપની લિમિટેડ (MGVCL)ના મેનેજમેન્ટ દ્વારા વિવિધ કારણોસર 800 જેટલા કર્મચારીઓને નોટિસ ફટકારતા MGVCLના 3500 કર્મચારીઓ સામુહિક રજા પર ઉતર્યા છે. પ્રાપ્ત વિગતો મુજબ શહેરના રેસકોર્સ સર્કલ પાસે MGVCLના કર્મચારીઓએ કંપનીના MD અને મેનેજમેન્ટ સામે ભારે રોષ ઠાલવ્યો હતો અને સુત્રોચ્ચાર કરીને ઉગ્ર વિરોધ નોંધાવ્યો હતો. એકસાથે આટલી મોટી સંખ્યામાં વીજ કંપનીના કર્મચારીઓ રજા પર ઉતરી જતા વીજ પુરવઠા અને મેઈન્ટેનન્સની કામગીરી પર સ્વાભાવિક રીતે ગંભીર અસર થવાની છે.

સ્થાનિક મીડિયા રિપોર્ટ મુજબ ગુજરાત ઉર્જા સંયુક્ત સંકલન સમિતિના અગ્રણીઓના જણાવ્યાનુસાર MGVCLના MD અને મેનેજમેન્ટના ઉચ્ચ અધિકારીઓ દ્વારા વિવિધ નાના-મોટા કારણોસર 800 જેટલા કર્મચારીઓ સામુહિક નોટિસ આપવામાં આવી છે. જેના વિરોધ આજે 3500 કર્મચારીઓ સામુહિક રજા પર ઉતરી ગયા છે. અમારું આ આંદોલન અક્કડ અને જિદ્દી વલણ ધરાવતા MD અને મેનેજમેન્ટ સામે છે. જે રીતે અમારા કર્મચારીઓ પર MD અને મેનેજમેન્ટ દ્વારા ત્રાસ આપવામાં આવતો હોવાથી આજે અમે વિરોધ કરી રહ્યા છે.

MGVCLના એક કર્મચારીએ જણાવ્યું કે, ‘MGVCLના ટેક્નિકલ અને નોન ટેક્નિકલ એન્જિનિયરોને વર્ષો પહેલાના જૂના કેસોની તપાસ કરીને તેણી ખણખોદ કરવામાં આવે છે. તેમજ તેમ આ કામ કેમ નથી કર્યું? તે અંગે કારકદર્શક નોટિસ અને શિસ્ત ભંગના પગલાઓ લેવામાં આવી રહ્યા છે. જેના લીધે હાલ દરેક કર્મચારી માનસિક રીતે હેરાન છે. જેથી બધા કારકદર્શક નોટિસ વગેરે પરત ખેંચો તે અમારી માંગ છે. આજે મધ્ય ગુજરાત વીજ કંપની લિમિટેડના 3500 કર્મચારીઓ રજા પર છે.’