LRD ભરતી વિવાદ: મહિલા ઉમેદવારોએ ફરીથી આંદોલનની ચીમકી ઉચ્ચારી

અમદાવાદ: ગુજરાતમાં કેટલાય મહિનાથી લોકરક્ષક દળ (LRD) ભરતી વિવાદમાં રહી છે. LRDની પરીક્ષા આપનાર અને કોન્સ્ટેબલ તરીકેની નોકરી માટે લાયકાત જાહેર કરવામાં આવેલી મહિલા ઉમેદવારોએ ધમકી આપી છે કે જો તેઓને 20મી જુલાઈ સુધીમાં એપોઈન્ટમેન્ટ લેટર આપવામાં નહીં આવે તો ફરીથી આંદોલન શરૂ કરશે. જણાવી દઈએ કે, LRDની ભરતી માટે 5227 લાયકાત ધરાવતા કેન્ડિડેટ્સ છે, જેમાંથી હજુ 3673ને એપોઈન્ટમેન્ટ લેટર આપવાનો બાકી છે.

આંદોલનના કન્વીનર સુરેશ ચૌધરીએ જણાવ્યું હતું કે, સરકારે જિલ્લાઓને ફાળવવા અને ઉમેદવારો પર તબીબી પરીક્ષણો કરવાની પ્રક્રિયા પૂર્ણ કરી લીધી હોવા છતાં મોટાભાગના ઉમેદવારોને એપોઈન્ટમેન્ટ લેટર મળ્યા નથી. તેમણે કહ્યું, ‘અમે જુદા જુદા જિલ્લા અધિકારીઓને મેમોરેન્ડા સોંપતાં કહ્યું હતું કે, જો તેઓને એપોઈન્ટમેન્ટ લેટર નહીં આપવામાં આવે તો અમે ફરીથી ગાંધીનગરમાં ધરણા પર બેસીશું.’ આ મહિલા એલઆરડી ઉમેદવારોએ ફેબ્રુઆરીમાં તેમના બે મહિનાના આંદોલનને સમાપ્ત કર્યું હતું.

ચૌધરીએ જણાવ્યું હતું કે 1,499 લાયકાત ધરાવતા ઉમેદવારોને પહેલા નોકરી આપવામાં આવી હતી અને બીજા 55ને પછીથી એપોઈન્ટમેન્ટ લેટર આપવામાં આવ્યા હતા. તેમણે જણાવ્યું હતું કે, મોટા ભાગના ઉમેદવારોને હજુ એપોઈન્ટમેન્ટ લેટર મળવાના બાકી છે. LRD મહિલાઓએ કોરોનાકાળમાં પણ સોશિયલ ડિસ્ટન્સિંગ સાથે આંદોલન શરૂ કરવાની ચીમકી ઉચ્ચારી છે.

ઉલ્લેખનીય છે કે, અનામત અનેે બિનઅનામત કેટેગરીના ઉમેદવારોના લાંબા વિરોધ બાદ રાજ્ય સરકારે LRDની નોકરી માટે કટ ઓફ માર્ક 62.5 સેટ કર્યો હતો. જોકે, હજુ મોટાભાગના લાયકાત ધરાવતા કેન્ડિડેટ્સને એપોઈન્ટમેન્ટ લેટર ન મળતા તેઓ ફરીથી ઉગ્ર આંદોલનની ધમકી આપી છે.