LRD ભરતી વિવાદનો અંત, બાકી રહેલા ઉમેદવારોને આજે એપોઈન્ટમેન્ટ લેટર અપાશે

અમદાવાદ: લોકરક્ષક દળ (LRD)ની મહિલા ઉમેદવારો માટે મહત્વના સમાચાર સામે આવ્યા છે. જે મુજબ LRD મહિલા ઉમેદવારોમાં બાકી રહેલા ઉમેદવારોને આજે એપોઈન્ટમેન્ટ લેટર આપવાની જાહેરાત કરવામાં આવી હોવાનું મીડિયા રિપોર્ટના માધ્યમથી જાણવા મળ્યું છે. આજે મહિલા ઉમેદવારોને નિમણુંક પત્ર આપ્યા બાદ બિન હથિયારી અને હથિયારી મહિલા લોકરક્ષકોએ 15 જુલાઈ સુધી ફરજ પર હાજર થવા માટેનો ગુજરાતના પોલીસ વડા શિવાનંદ ઝાએ આદેશ કર્યો છે. આમ છેલ્લા કેટલાય સમયથી ચાલી રહેલા LRD ભરતી વિવાદનો અંત આવ્યો છે.

ગુજરાતમાં કેટલાય મહિનાથી લોકરક્ષક દળ (LRD) ભરતો વિવોદ ચાલી રહ્યો હતો. જોકે બાકી રહી ગયેલા ઉમેદવારોને નિમણુક પત્ર આપવાની જાહેરાત કરતા આજે આ વિવાદનો અંત આવ્યો છે. ગુરુવારે LRDની પરીક્ષા આપનાર અને કોન્સ્ટેબલ તરીકેની નોકરી માટે લાયકાત જાહેર કરવામાં આવેલી મહિલા ઉમેદવારોએ ધમકી આપી હતી કે જો તેઓને 20મી જુલાઈ સુધીમાં એપોઈન્ટમેન્ટ લેટર આપવામાં નહીં આવે તો ફરીથી આંદોલન શરૂ કરશે. જણાવી દઈએ કે, LRDની ભરતી માટે 5227 લાયકાત ધરાવતા કેન્ડિડેટ્સ છે, જેમાંથી હજુ 3673ને એપોઈન્ટમેન્ટ લેટર આપવાનો બાકી છે.

શું હતો LRD ભરતી વિવાદ?
પોલીસની ભરતીમાં મહિલાઓને 33 ટકા અનામત આપવામાં આવ્યું છે. જેમાં 1લી ઓગસ્ટ, 2018ના ગુજરાત સરકારે પરિપત્ર બહાર પાડ્યો હતો. આ પરિપત્ર મુજબ મહિલા ઉમેદવારે જે કેટેગરીમાં ફોર્મ ભર્યુ તેમાં જ તેની પસંદગી શક્ય બની છે. કોઈ મહિલાએ OBC કેટેગરીમાં ફોર્મ ભર્યુ હોય તો તેને જનરલ કેટેગરીમાં સ્થાન ન મળી શકે, જેના કારણે રાજ્યમાં આંદોલન શરૂ થયા હતા. જોકે અનામત અને બિનઅનામત કેટેગરીના ઉમેદવારોના લાંબા વિરોધ પછી રાજ્ય સરકાર આખરે એલઆરડી નોકરી માટે કટ-ઓફ માર્ક તરીકે 62.5 સેટ કર્યો હતો.