J&K: મૃતદેહ પાસે બેઠો હતો 3 વર્ષનો બાળક, ગોળીઓના વરસાદ વચ્ચે આમ CRPFએ બચાવ્યો જીવ

સોપોરઃ જમ્મુ કાશ્મીરના સોપોરમાં બુધવારે સવારે એક એન્કાઉન્ટર થયું હતું. એન્કાઉન્ટર દરમિયાન એક તસવીર સામે આવી હતી. આ તસવીર જેણે પણ જોઈ તેનું હૃદય હચમચી ગયું હતું. હકીકતમાં એન્કાઉન્ટર દરમિયાન એક વ્યક્તિને આતંકીઓએ ગોળી મારી હતી. આ વ્યક્તિ સાથે રહેલો 3 વર્ષનો બાળક પોતાના નાનાના મૃતદેહ પાસે બેસીને રડતો રહ્યો. જોકે, સુરક્ષાદળોએ બાળકને સુરક્ષિત બચાવી લીધો હતો. આ બાળકને કેવી રીતે બચાવાયો તે વિશે સોપોરના એસએચઓ અઝીમ ખાને જણાવ્યું હતું.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

‘મસ્જિદના ઉપરના માળેથી થતું હતું ફાયરિંગ અને…’
એસએચઓ અઝીમ ખાને જણાવ્યું કે,’જ્યારે અમે ત્યાં પહોંચ્યા તો ખૂબ જ ફાયરિંગ થઈ રહ્યું હતું અને એક નાનો બાળક પણ આસપાસ ફરી રહ્યો હતો. બીજી બાજુથી ગોળીઓનો વરસાદ વરસી રહ્યો હતો. તમે જોયું હશે કે એન્કાઉન્ટરની જગ્યા પર મસ્જિદના ઉપરના માળેથી પણ ફાયરિંગ થઈ રહ્યું હતું. તે બાજુથી જે ફાયરિંગ થયું હતું. તેમાં જ લોકો ઈજાગ્રસ્ત થયા હતાં. અમારો સીઆરપીએફનો જવાન પણ ઘાયલ થયો હતો, જે પછી શહીદ થઈ ગયો હતો.’

આ રીતે બાળકનો બચાવ્યો જીવ
અઝીમ ખાને આગળ જણાવ્યું હતું કે,’અમારુ કામ સૌથી પહેલા એવું હતું કે વ્યૂ બ્લોક કરવામાં આવે અને બાળકને ત્યાંથી ઉઠાવી લેવામાં આવે. અમારી પાસે જે સીઆરપીએફ અને પોલીસની બીપી ગાડીઓ હતી, તેને એક પછી એક કતારમાં કરીને વ્યૂ બ્લોક કર્યો, જેથી ત્યાં ફાયરિંગ પહોંચી ન શકે. બાળકને ઉઠાવવો એ જ અમારી પ્રાથમિકતા હતી. જે ખૂબ જ પડકારભર્યું હતું. ત્યાં કોઈ જ આડશ નહોતી પછી પણ અમે બાળકને બચાવ્યો. આ બાળક પોતાના નાના સાથે હંદવાડા જઈ રહ્યો હતો, અમારી સીઆરપીએફની ટૂકડી તૈનાત થઈ રહી હતી કે અચાનક જ તે દિશામાંથી ફાયરિંગ થવા લાગ્યુ હતું.’

એક નાગરિકની કરી હત્યા, એક જવાન શહીદ
જાણકારી અનુસાર, એન્કાઉન્ટર શરુ થતાં પહેલા જ આતંકવાદીઓએ બાળકના નાનાને ગોળી મારી દીધી હતી. બાળકને બચાવીને ટૂકડીએ ઘરે પહોંચાડ્યો છે. હકીકતમાં, સોપોરમાં આતંકવાદીઓએ CRPFના કાફલા પર ઘાત લગાવીને હુમલો કર્યો હતો. બન્ને તરફથી ગોળીબારીમાં CRPFનો એક જવાન શહીદ થઈ ગયો જ્યારે આતંકવાદીઓએ એક નાગરિકની હત્યા પણ કરી છે.