અંબાણીની અનલિસ્ટેડ કંપની HDFCથી પણ આગળ, વર્ષમાં 150 ટકા આપ્યું રિટર્ન

પવન નહાર, નવી દિલ્હી: Reliance Industriesએ જુન ક્વાર્ટરમાં પણ બજારને નિરશા નથી કર્યું. જિયો પ્લેટફોર્મ્સમાં હિસ્સો વેચીને અને રાઈટ્સ ઈશ્યૂ દ્વારા કંપનીએ જંગી ભંડોળ એકત્ર કર્યું છે. માર્ચ મહિનામાં શેરબજારમાં જે જોરદાર કડાકો બોલાયો હતો ત્યારે RILના શેરે જે તળીયું બનાવ્યું હતું તેના કરતા કંપનીનો શેર હાલ ડબલ ભાવે ટ્રેડ થઈ રહ્યો છે. જોકે, મુકેશ અંબાણીની અનલિસ્ટેડ કંપની Reliance Retail (RRL)નું પ્રદર્શન તો RIL કરતાં પણ સારું રહ્યું છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

અનલિસ્ટેડ માર્કેડમાં ટ્રેડ થતાં RRLના શેરે આ વર્ષમાં 150 ટકા રિટર્ન આપ્યું છે. 30 જૂનના રોજ આ શેર 1100 રુપિયાની સર્વોચ્ચ સપાટીએ ટ્રેડ થઈ રહ્યો હતો. જાન્યુઆરી 2020માં 425-450ના સ્તરે ટ્રેડ થઈ રહેલા આ અનલિસ્ટેડ શેરમાં ત્યારથી જ સતત વધારો જોવા મળી રહ્યો છે. વળી, લોકડાઉનના પિરિયડમાં તો તે જાન્યુઆરીના સ્તરથી ડબલ થઈ ગયો હતો.

રિલાયન્સ દેવામુક્ત થઈ ગઈ છે તેવી મુકેશ અંબાણીએ જાહેરાત કર્યા બાદ આ શેરમાં સતત તેજી જોવાઈ રહી છે. વળી, RILમાં હાલ જે ઉછાળો જોવા મળ્યો તેનો ફાયદો પણ RRLને થયો છે. મુકેશ અંબાણીની રિલાયન્સ રિટેલ હવે કિશોર બિયાણીના ફ્યુચર ગ્રુપને હસ્તાંતરિત કરવાની તૈયારી કરી રહી છે. જેમાં ફ્યુચર રિટેઈલ, ફ્યુચર લાઈફસ્ટાઈલ ફેશન્સ અને ફ્યુચર સપ્લાય ચેન સોલ્યૂશનનો સમાવેશ થશે.

જોકે, કેટલાક એનાલિસ્ટ રિલાયન્સ રિટેલના શેરને ઓવરપ્રાઈસ્ડ માની રહ્યા છે. કોલકાતા સ્થિત અભિષેક સિક્યોરિટીઝના સંદીપ ગિનોડિયાના જણાવ્યા અનુસાર, રિટેલ ભારતીય અર્થતંત્રમાં એક સારી થીમ છે. પરંતુ હાલમાં જે કંઈ ડિલ્સ થઈ છે ત્યારબાદ હવે રોકાણકારો માટે ખાસ કંઈ વધતું નથી. તેમણે એમ પણ જણાવ્યું હતું કે, અત્યારે RRLની માર્કેટ વેલ્યૂ 6 લાખ કરોડ થઈ ગઈ છે. જે HDFC અને HULથી પણ વધુ છે.

RRLના 99.95 ટકા શેર્સ RIL પાસે છે, અને માત્ર 35 લાખ શેર્સ અનલિસ્ટેડ સ્ટોક્સના અનઓફિશિયલ માર્કેટમાં ટ્રેડ થઈ રહ્યા છે. માર્કેટમાં ઉપલબ્ધ શેર્સની સંખ્યા મર્યાદિત હોવાના કારણે તેના ઉંચા ભાવ બોલાઈ રહ્યા હોવાનું પણ એક્સપર્ટ્સનું માનવું છે.