CCTV: રુપિયા મામલે થયેલી નજીવી રકઝક બાદ મામલો હત્યા સુધી પહોંચ્યો

એક ઝણઝણાટી ઉભી કરી દે તેવી ઘટના CCTV કેમેરામાં કેદ થઈ ગઈ છે. જેમાં એક પ્રાઈવેટ હોસ્પિટલના સ્ટાફ દ્વારા રુપિયાની બાબતે થયેલી તકરાર બાદ મામલો હત્યા સુધી પહોંચી જાય છે. આ ઘટના ઉત્તરપ્રદેશના અલિગઢમાં આવેલી એક ખાનગી હોસ્પિટલ પાસે બની હતી. જેમાં આવેશમાં આવેલા શખ્સે અન્ય યુવક પર જીવનલેણ હુમલો કરી દીધો હતો.

પોલીસે આ ઘટનાની ફરિયાદ નોંધીને આ અંગે વધુ તપાસ શરુ કરી દીધી છે. અલીગઢમાં કુરેશી બાયપાસ પાસે આવેલી ખાનગી હોસ્પિટલમાં સારવાર માટે સુલ્તાન ખાન નામનો શખ્સ આવ્યો હતો ત્યારે તેના પર હુમલાની ઘટના બની. સુલ્તાન ખાનને પાછલા કેટલાક દિવસથી પેશાબ આવવામાં તકલીફ થતી હતી જેના માટે તે હોસ્પિટલ આવ્યો હતો અને ત્યાં થયેલી રકઝક બાદ મામલો ઝપાઝપીમાં આવી ગયો અને આ પછી ઉશ્કેરાયેલા શખસે કથિત રીતે સુલ્તાન ખાનની હત્યા કરી નાખી.

CCTV કેમેરામાં કેદ થયેલા દૃશ્યમાં દેખાય છે કે, 44 વર્ષનો શખ્સ સુલ્તાન ખાન પહેલા રુપિયાની રકઝક મામલે હોસ્પિટલના સ્ટાફ પર હુમલો કરી દે છે. આ પછી ભડકી ઉઠેલો શખ્સ હોસ્પિટલમાં જાય છે અને એક અન્ય શખ્સ સાથે બહાર આવે છે આ દરમિયાન તેના હાથમાં કોઈ વસ્તુ પણ પકડેલી હોય છે. આ જોઈને સુલ્તાન ત્યાંથી ભાગવાની કોશિશ કરે છે પણ અન્ય શખ્સ તેના સ્કૂટરને રોકી દે છે. જે બાદ હોસ્પિટલમાં ફરજ બજાવતા યુવક દ્વારા કથિત રીતે હુમલો કરનારા શખ્સની હત્યા કરી દેવામાં આવે છે.