બોલો, મોબાઈલ ફોન ચાઈનાનો હશે તો રિપેરિંગમાં ડબલ રુપિયા ચૂકવવા પડશે

ગુરુગ્રામઃ ચીન સામે દેશભરમાં આક્રોશ વ્યક્ત કરાઈ રહ્યો છે. હવે જેમણે ચાઈનાનો ફોન ખરીદ્યો છે તેમની તકલીફમાં વધારો થઈ ગયો છે. જો ફોન ખરાબ થયો તો પહેલા તેનું રિપેરિંગ મુશ્કેલથી થશે, અને જો થઈ ગયો તો તેના માટે કિંમત બમણી ચૂકવવી પડશે. કારણ કે ચીનના મોબાઈલ ફોનના પાર્ટ્સ હવે નથી મળી રહ્યા. જેના કારણે હવે લોકો ચાઈનાના ફોનના બદલે અન્ય બ્રાન્ડના ફોન ખરીદવાનું પસંદ કરી રહ્યા છે.

શહેરમાં મોટાભાગના દુકાનદારો મોબાઈલ એસેસરીઝ અને પાર્ટ્સ દિલ્હીથી ખરીદે છે. ઘણાં દુકાનદારો સ્ટોકિસ્ટનેફોન પર ઓર્ડર કરીને માલ મંગાવે છે. દુકાનદારોનું માનીએ તો ચીનના ફોનના પાર્ટ્સ નથી આવતા, જેના કારણે તેની શોર્ટેજ છે. દિલ્હીમાં જે દુકાનદારો પાસે તેના પાર્ટ્સ બચ્યા છે, તેઓ તેને વધારે ભાવમાં વેચી રહ્યા છે. મેમરી કાર્ડ પર 100 રુપિયા, બેટરી પર 50થી 150 રુપિયા, સ્પીકર પર 100થી 200 રુપિયા વધારી દીધા છે.

ત્રણ ગણો ભાવમાં વધારો કરાયો

મોબાઈલ ફોન રિપેરિંગની દુકાન ચલાવતા કપિલ ગુપ્તા જણાવે છે કે રિપેરિંગનો સામાન 2-3 ગણો મોંઘો થઈ ગયો છે. પેહલા જે ફોલ્ડર 800 રુપિયામાં આવતું હતું હવે તેના 1500 રુપિયા થઈ ગયા છે. આ રીતે ચાર્જિંગ પેજના ભાવમાં 100 રુપિયાનો વધારો થઈ ગયો છે. જેઓ હોલસેલ માલ સપ્લાય કરે છે તેમણે ડિમાન્ડ વધારી દીધી છે. મોબાઈલ ફોનના ઘણાં પાર્ટ્સ એવા છે જે સરળતાથી નથી મળી રહ્યા.

ઈન્ડિયન કે અન્ય દેશના ફોન કરી રહ્યા છે પસંદ

મોબાઈલ ફોન ખરીદનારા ગ્રાહકો ઈન્ડિયન બ્રાન્ડ અને ચાઈનાને છોડીને અન્ય દેશોના મોબાઈલ ફોન ખરીદવાનું પસંદ કરી રહ્યા છે. મોબાઈલ ફોનની દુકાનોનું માનીએ તો ગ્રાહકોમાં ચાઈનીઝ ફોનની માંગમાં 40-50% ઘટાડો નોંધાયો છે. જે દુકાનો પાસે ચાઈનીઝ મોબાઈલ છે, તેઓ વેચવાનો પ્રયાસ કરી રહ્યા છે. શહેરના સદર બજાર, ઓલ્ડ દિલ્હી રોડ, ડૂડાહેડા, સાઈબર હબ, સિકંદરપુર, ડીએલએફ અને અન્ય વિસ્તારમાં મોબાઈલ એક્સેસરિઝની હજારો દુકાનો છે.

એક મોબાઈલની શોપ ચલાવતા વ્યક્તિએ જણાવ્યું કે, ગ્રાહકો ચાઈનીઝ મોબાઈલ ફોન ખરીદવાનું વધારે પસંદ નથી કરી રહ્યા. સેમસંગની સાથે લાવા, મોટો, ટેક્નો વગેરે મોબાઈલના વેચાણમાં વધારો થયો છે. જોકે, ઓનલાઈન બજારમાં ચાઈનીઝ મોબાઈલ વેચાઈ રહ્યા છે.