ડિગ્રી એન્જિ.ની પ્રવેશ પ્રક્રિયાની તારીખ જાહેર, ઓનલાઈન રહેશે તમામ પ્રોસેસ

અમદાવાદ: ધોરણ 12 સાયન્સનું રિઝલ્ટ આવ્યાને ઘણા દિવસો વિતિ ગયા છે, ત્યારે ડિગ્રી એન્જિનિયરિંગમાં પ્રવેશ પ્રક્રિયા ટૂંક સમયમાં શરુ થશે. રાજ્યની વિવિધ એન્જિ. કોલેજોની 66 હજારથી પણ વધુ બેઠકો માટે 9 જુલાઈથી ઓનલાઈન રજિસ્ટ્રેશન શરુ થશે, જે 8 ઓગસ્ટ સુધી ચાલશે. સમગ્ર એડમિશન પ્રક્રિયા ઓનલાઈન રહેશે અને જરુર પડ્યે એડમિશન કમિટિ દ્વારા નક્કી કરાયેલા સાયબર સ્પેસ સેન્ટર પર પણ સ્ટૂડન્ટ રજિસ્ટ્રેશન કરાવી શકશે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

એડમિશન માટે સૌ પહેલા ઓનલાઈન રજિસ્ટ્રેશન કરાવવાનું રહેશે. ત્યારબાદ લાગતા-વળગતા ડોક્યુમેન્ટ્સ અપલોડ કરવાના રહેશે. એડમિશન માટે 300 રુપિયા ફી પણ ઓનલાઈન ભરવાની છે. જે વિદ્યાર્થી ઓનલાઈન રજિસ્ટ્રેશન કરાવવાની વ્યવસ્થા ના હોય તેઓ સાયબર કાફેમાં જઈ ફોર્મ ભરી શકશે. જો ફોર્મમાં કોઈ ભૂલ હશે તો તેની સ્ટૂડન્ટને SMS કે ઈમેલ દ્વારા જાણ કરાશે. આ સિવાય વિદ્યાર્થીને કોઈ પ્રશ્ન હોય તો તેના માટે હેલ્પલાઈન નંબર પણ જાહેર કરાયો છે.

આ વર્ષે રાજ્યના વિવિધ જિલ્લામાં આવેલી સરકારી કોલેજોની 95 ટકા પર પ્રવેશ સમિતિ દ્વારા એડમિશનની કાર્યવાહી કરાશે. જ્યારે સેલ્ફ ફાઈનાન્સ કોલેજોની અડધી બેઠકો સંચાલકો પોતાની રીતે અરજી મગાવી મેરિટના ધોરણે ભરી શકશે. સરકારી કોલેજોમાં સામાન્ય રીતે ગુજકેટના આધારે એડમિશન મળે છે. જોકે, આ વર્ષે જેમણે જેઈઈ મેઈન આપી હોય તેમના માટે ગ્રાન્ટેડ કોલેજોમાં 5 ટકા બેઠકો અનામત રહેશે. જેના પર રાજ્ય બહારના વિદ્યાર્થીઓ પણ એડમિશન લઈ શકશે.