ભારતના મિત્રોને પરેશાન કરી રહ્યું છે ચીન! હવે ભૂટાનની જમીન પર દાવો કર્યો

લદ્દાખમાં ભારત વ્યૂહાત્મક, આર્થિક અને કૂટનીતિક જવાબથી ગભરાયેલું ચીન હવે એક નવી ચાલ દ્વારા ભારતના મિત્ર દેશોને પરેશાન કરવાનો પ્રયાસ કરી રહ્યું છે. ડ્રેગને ભૂટાનની ભારતને અડીને આવેલી સીમાવાળા જમીનના ટૂકડા પર દાવો કર્યો છે. દુનિયાભરમાં ચારેય બાજુએથી ઘેરાયેલા ચીનના આ પગલાને ભારત પર પ્રેશર બનાવવાની નીતિ તરીકે જોવાઈ રહ્યા છે. હકીકતમાં તેને ભારતના નિકટના મિત્રોને પરેશાન કરવાની ચીનની નવી રણનીતિ માનવામાં આવી રહી છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

ચીનનો ભૂટાન સાથે સીમા વિવાદ
શનિવારે ચીની વિદેશ મંત્રાલયે કહ્યું હતું કે ચીન અને ભૂટાનની સીમાનું ક્યારેય નિર્ધારણ નથી થયું અને પૂર્વ, મધ્ય તથા પશ્ચિમ ક્ષેત્રમાં લાંબા સમયથી વિવાદ ચાલી રહ્યો છે. ચીને ભારત તરફ ઈશારો કરતા કહ્યું કે કોઈ ત્રીજા પક્ષે ચીન-ભૂટાન સીમા વિવાદમાં આંગળી ન ઉઠાવવી જોઈએ. ચીન અને ભૂટાને વર્ષ 1984થી લઈને 2016 વચ્ચે અત્યાર સુધી 24 વખત વાતચીત કરી છે. આ દરમિયાન માત્ર પશ્ચિમ અને મધ્ય વિસ્તારના વિવાદ પર ચર્ચા થઈ હતી.

ઉલ્લેખનીય છે કે ચીને ભૂટાનના ગ્લોબલ એન્વાયરમેન્ટ ફેસિલીટી કાઉન્સિલથી મદદવાળા આવેદન પર વિરોધ વ્યક્ત કર્યો હતો. ભૂટાને આ મદદ દેશના પૂર્વ ભાદમાં સ્થિત વન્યજીવ અભયારણ માટે માગી હતી. ચીને પોતાના વિરોધમાં કહ્યું હતું કે આ વિવાદિત હિસ્સો છે.

જોકે ચીનના વિરોધ બાદ પણ ભૂટાનને મદદ મળી પરંતુ ચીનના દાવાને ધમકી તરીકે જોવાઈ રહ્યો છે. કારણ કે બંને દેશો વચ્ચે પૂર્વ વિસ્તારમાં ક્યારેય સીમા વિવાદને લઈને વાતચીત નથી થઈ. ચીનના આ દાવા બાદ ભૂટાને નવી દિલ્હી સ્થિત ચીનના દૂતાવાસને કડક શબ્દોમાં મેસેજ મોકલ્યો છે. ભૂટાને કહ્યું કે, સાકતેંગ વન્યજીવન અભયારણ ભૂટાનનું અભિન્ન અને સંપ્રભુ ભાગ છે.

ભારત સાથે મિત્રતા હોવાના કારણે ભૂટાનને પરેશાન કરાયું?
સૂત્રોનું માનવું છે કે ચીનનો આ દાવો ભારતના નિકટના મિત્ર ભૂટાન પર પ્રેશર બનાવવા માટે છે. સૂત્રોનું કહેવું છે કે ભારતના નિકટ હોવાના કારણે ડ્રેગન ભૂટાનને દંડ આપવા ઈચ્છે છે. જોકે ભારતે હજુ સુધી તેના પર કોઈ પ્રતિક્રિયા આપી નથી.