ચાઈનીઝ એપ્સ પર પ્રતિબંધ કેમ મૂકાયો, હવે યૂઝર્સ શું કરશે?

સરકારે 59 ચાઈનીઝ એપ્સ પર મૂક્યો પ્રતિબંધ

નવી દિલ્હી: ભારત સરકાર તરફથી 50થી વધુ ચાઈનીઝ એપ્સ પર પ્રતિબંધ મૂકવાનો મોટો નિર્ણય લેવાયો છે. પ્રતિબંધિત કરાયેલી એપ્સની યાદીમાં ઘણી પોપ્યુલર એપ્સ સામેલ છે અને ટિકટોક, યુસી બ્રાઉઝર અને શેરઈટ જેવા નામ છે. એપ્સને પ્રતિબંધિત કરવાનું કારણ તેનું ચાઈનીઝ હોવું નહીં, પરંતુ દેશની સુરક્ષા અને એકતા જાળવી રાખવા માટે આ પગલું જરૂરી હોવું છે. લગભગ 59 એપ્સને ટૂંક સમયમાં જ ગુગલ પ્લે સ્ટોર અને એપલ એપ સ્ટોર પરથી હટાવી દેવાશે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial

ચાઈનીઝ એપ્સ-પ્રોડક્ટ્સનો થઈ રહ્યો છે વિરોધ

ભારત અને ચીન સરહદ પર છેલ્લા કેટલાક સમયથી ચાલતા તણાવ વચ્ચે 15 જૂને ગલવાન ઘાટીમાં સૈનિકોની શહીદી બાદથી જ ચાઈનીઝ એપ્સ પ્રતિબંધિત કરવાના અને પ્રોડક્ટ્સને બોયકોટ કરવાની માગ ઉઠી રહી હતી. એપ્સને પ્રતિબંધિત કરવાનું સાચું કારણ સત્તાવાર સ્ટેટમેન્ટમાં ઈન્ફોર્મેશન અને ટેકનોલોજી મિનિસ્ટ્રીએ જણાવ્યું છે. તેમાં કહેવાયું છે કે, મંત્રાલયને અલગ-અલગ સોર્સથી આ એપ્સ અંગેની ફરિયાદો મળી રહી હતી અને ઘણા રિપોર્ટસમાં યૂઝર્સના ડેટાનો ખોટો ઉપયોગ કરવાની વાત પણ સામે આવી હતી.

ઓફિશિયલ સ્ટેટમેન્ટમાં શું કહેવાયું છે?

ઓફિશિયલ સ્ટેટમેન્ટ મુજબ, એન્ડ્રોઈડ અને iOS પ્લેટફોર્મ્સ પરથી ‘યૂઝર્સના ડેટા ચોરી કરવાની અને ભારતની બહારના ખોટા પ્રકારના સર્વરમાં સ્ટોર કરવાની વાત પણ સામે આવી હતી.’ સ્ટેટમેન્ટમાં કહેવાયું છે કે, ડેટા ચોરી અંગેની ફરિયાદોને જોતા જણાયું છે કે, તે ભારતની રાષ્ટ્રીય સુરક્ષા માટે ખતરો છે અને આ રીતે ભારતની એકતા અને અખંડતાને પણ નુકસાન પહોંચાડવાનો પ્રયાસ કરવામાં આવી શકે છે. એટલે આ એપ્સ સામે ઈમરજન્સી એક્શન લેવાની જરૂર અનુભવાઈ છે.

ડેટાની સુરક્ષા જરૂરી

સરકાર તરફથી આ એપ્સ પર પ્રતિબંધ મૂકવાનો કરવાનો નિર્ણય એ કારણે લેવાયો છે કે જેથી તે દેશના નાગરિકોનો ડેટા એક્સેસ ન કરી શકે અને તેનો ખોટો ઉપયોગ ન કરવામાં આવે. ભારત સરકારની એજન્સી કોમ્પ્યુટર ઈમરજન્સી રિસ્પોન્સ ટીમ CERT-In તરફથી પણ કહેવાયું હતું કે, ઘણી એપ્સમાં યૂઝર્સની પ્રાઈવસીનો ભંગ જેવા મામલા જોવા મળ્યા છે. તે ઉપરાંત ઈન્ડિયન સાઈબર ક્રાઈમ કોર્ડિનેશન સેન્ટર અને હોમ મિનિસ્ટ્રી તરફથી પણ આ એપ્સને બ્લોક કરવા કહેવાયું હતું.

ઘણા મોટા નામ સામેલ

ચાઈનીઝ એપ્સ પર ઈન્ફોર્મેશન ટેકનોલોજી એક્ટ 69A એક્શન અને ઈન્ફોર્મેશન ટેકનોલોજી (પબ્લિક ઈન્ફોર્મેશનનું એક્સેસ સુરક્ષાની દ્રષ્ટિએ બ્લોક કરવા સાથે સંલગ્ન) નિયમ, 2009 અંતર્ગત કાર્યવાહી કરવામાં આવી છે. પ્રતિબંધિત કરાયેલી એપ્સના લિસ્ટમાં પોપ્યુલર ટિકટોક, શેરઈટ, યુસી બ્રાઉઝર, બાયદૂ મેપ, હેલો, લાઈક, મી કોમ્યુનિટી, ક્લબ ફેક્ટરી, યુસી ન્યૂઝ, વીબો, મી વિડીયો કોલ-શાઓમી, વીવો વિડીયો, ક્લીન માસ્ટર અને કેમ સ્કેનર જેવી એપ્સ સામેલ છે, જેના લાખો ડાઉનલોડ્સ છે.

હવે શું કરશે યૂઝર્સ?

સરકારનું કહેવું છે કે, ભારતીયના સાઈબરસ્પેસની સુરક્ષા તેની જવાબદારી છે, જેનાથી ભારતમાં મોબાઈલ અને ઈન્ટરનેટ યૂઝર્સને કોઈપણ પ્રકારના નુકસાનથી બચાવી શકાય. એવામાં જરૂરી પડવા પર ભવિષ્યમાં પણ આ પ્રકારના પગલાં લેવામાં આવી શકે છે અને યૂઝર્સને સારા ઓપ્શન આ પ્રતિબંધ પછી ઉપલબ્ધ કરાવાશે. પ્રતિબંધિત કરાયેલી એપ્સને પ્લે સ્ટોર અને એપ સ્ટોરથી હટાવી દેવાશે અને જે ડિવાઈસીઝમાં આ એપ્સ છે, હાલ યૂઝર્સ તેને યૂઝ કરી શકશે. જોકે, તેને બાદમાં બ્લોક કરવામાં આવી શકે છે, એટલે યૂઝર્સ ને એવા ફીચર્સવાળી બીજી એપ્સ પર સ્વિચ કરવાની સલાહ આપવામાં આવે છે.