અમદાવાદ: જૂનમાં કોરોનાનું જોર ઘટ્યું, કેસ અને મૃત્યુઆંકમાં આટલો ઘટાડો

પાર્થ શાસ્ત્રી, અમદાવાદ: મે અને જૂન મહિનામાં રાજ્યના બે જિલ્લાઓ અમદાવાદ અને સુરતમાં કોરોનાના કુલ કેસોના 82% અને 75% કેસ અનુક્રમે નોંધાયા છે. આ બે મહિનાઓમાં જ આ બંને જિલ્લાઓમાં કુલ મૃત્યઆંકના 89.4% અને 85% મોત અનુક્રમે નોંધાયા છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

જો કે, કોવિડ-19ના નેશનલ હોટસ્પોટ બનેલા અમદાવાદમાં જૂન મહિનામાં કેસ અને મૃત્યુઆંકમાં ઘટાડો જોવા મળ્યો. જ્યારે સુરતમાં મે મહિનાના સરખામણીમાં ત્રણ ગણા કેસ અને બમણો મૃત્યુઆંક જૂન મહિનામાં જોવા મળ્યો. 30 જૂને પહેલીવાર એવું બન્યું કે, સુરત જિલ્લા અને શહેરમાં અમદાવાદ કરતાં વધુ કેસ નોંધાયા. એ દિવસે સુરતના કુલ કેસની સંખ્યા 199 હતી જ્યારે અમદાવાદની 197.

જૂન મહિનામાં અમદાવાદમાં કુલ 8,733 કેસ અને 599 મોત નોંધાયા જે મે મહિનાના કુલ આંક કરતા ઓછા હતા. મે મહિનામાં કુલ 9,154 કેસ અને 693 મૃત્યુ નોંધાયા હતા. મતલબ કે જૂનમાં મેની સરખામણીએ 421 કેસ (5%) અને 94 મોત (14%) ઓછા નોંધાયા હતા. તો બીજી બાજુ સુરતમાં જૂનમાં 3209 કેસ અને 89 મોત નોંધાયા હતા. મે મહિનાની સરખામણીએ 1006 કેસ અને 44 મોત વધુ નોંધાયા.

જો કે, અમદાવાદ હજી પણ કુલ કેસ અને મૃત્યુઆંકની દ્રષ્ટિએ પ્રથમ ક્રમે છે. 25 જૂનથી 1 જુલાઈ સુધીના આંકડાઓના વિશ્લેષણ પરથી માલૂમ પડ્યું કે, સાત દિવસમાં અમદાવાદ શહેરમાં 1437 કેસ અને જિલ્લામાં 90 કેસ નોંધાયા. તો સુરતમાં આ જ સાત દિવસના સમયગાળામાં શહેરમાં 1209 અને જિલ્લામાં 109 કેસ નોંધાયા. આ જ પ્રકારે છેલ્લા અઠવાડિયામાં અમદાવાદમાં મૃત્યુઆંક 71 હતો જ્યારે સુરતમાં 24. સુરત કરતાં અમદાવાદમાં મૃત્યુઆંક ત્રણ ગણો વધારે હતો પરંતુ નોંધાયેલા કેસ 16 ટકા વધુ હતા. માસિક ડેટા પરથી તારણ નીકળ્યું કે, જૂનમાં કુલ કેસના 48.5%, મેમાં 38%, એપ્રિલમાં 13.2% અને માર્ચમાં 0.3% નોંધાયા. આ રીતે જૂનમાં કુલ મૃત્યુઆંકના 43.8% મોત, મે મહિનામાં 44.6%, એપ્રિલમાં 11.2% અને માર્ચમાં 0.4% મૃત્યુ નોંધાયા.