રાજકોટઃ લોકડાઉનમાં શો ન મળતા લોક ગાયકે પૈસા માટે ગાંજો વેચવાનું શરૂ કર્યું

રાજકોટઃ લોકડાઉનના કારણે કામ ન મળથા આર્થિક તંગીનો સામનો કરી રહેલા લોક ગાયકે ગેરકાયદે ગાંજો વેચવાનો ધંધો શરૂ કરી દીધો. રાજકોટ શહેરમાં રહેતો લોક ગાયક મનીષ દાન બદાણી 16 કિલો ગાંજા સાથે ઝડપાયો હતો. શહેરની બહાર આવેલા માલિયાસણ ગામમાંથી બુધવારે રાત્રે પોલીસે આરોપી લોક ગાયકને રૂપિયા 97,524ના મુદ્દામાલ સાથે ઝડપી લીધો.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

પોલીસે જણાવ્યું કે, બદાણીએ આ પ્રતિબંધિત ગાંજો સુરતના ડ્રગ ડિલર પાસેથી મેળવ્યો હતો. આ ગાંજાની ડિલિવરી સુરેન્દ્રનગર જિલ્લાના સાયલામાં કરવાની હતી. ગુરુવારે પ્રેસ કોન્ફરન્સને સંબોધિત કરતા ક્રાઈમ બ્રાન્ચના આસિસ્ટન્ટ પોલીસ કમિશનર જયદીપસિંહ સરવૈયાએ કહ્યું- અમને બાતમી મળી હતી કે બદાણી પોતાની કારમાં ગાંજો લઈ જઈ રહ્યો છે. આ બાદ અમે રાજકોટ બાયપાસ પર સોખડા ચોકડીએ વોચ ગોઠવી હતી. તેની કારને અટકાવીને ચેકિંગ કરતા અંદરથી ગાંજો મળ્યો હતો.

આ ગાંજો છ પેકેટ્સની અંદર ભરેલો હતો. સરવૈયા વધુમાં કહે છે, પૂછપરછ દરમિયાન બદાણીએ જણાવ્યું કે તેણે પૈસા કમાવવા માટે ગાંજો વેચવાનું શરૂ કર્યું હતું. લોકડાઉનના કારણે તેને શો નહોતા મળી રહ્યા અને તેની આવક શૂન્ય થઈ ગઈ હતી. આથી તેણે ગાંજાની દાણચોરીમાં પોતાનું નસીબ અજમાવવા વિશે વિચાર્યું.

સરવૈયા કહે છે, અમારી તપાસમાં જાણવા મળ્યું કે બદાણી પાછલા કેટલાક મહિનાઓથી આ ગાંજો સપ્લાય કરવાના ધંધામાં હતો. તે ગાંજાના નાના અને મોટા પેકેટ્સ બનાવતો અને ગ્રાહકોને 100 રૂપિયાથી 200 રૂપિયા સુધીમાં વેચતો હતો.

જાણકારી મુજબ, બદાણી જામનગર રોડ પર માધાપર ચાર રસ્તા પાસે રહેતો હતો. સરવૈયાએ જણાવ્યું કે, તેમણે બદાણીના રિમાન્ડ માટે માગણી કરી છે જેથી તે કેટલા સમયથી આ ધંધામાં છે અને કોને કોને ગાંજો સપ્લાય કર્યો છે તે જાણી શકાય.