‘ઈશ્કબાઝ’ની એક્ટ્રેસ અદિતિ ગુપ્તા કોરોનાથી સંક્રમિત, ઘરમાં જ ક્વોરન્ટીન થઈ

વધુ એક એક્ટ્રેસ કોરોનાથી સંક્રમિત

કોરોના વાયરસના કેસ રોજેરોજ વધી રહ્યા છે. ભારતમાં સંક્રમિતોના આંકડામાં રોજ ઉછાળો આવી રહ્યો છે. અત્યાર સુધીમાં આપણા દેશમાં 5 લાખથી વધુ લોકો કોરોનાની ચપેટમાં આવ્યા છે. ત્યારે વધુ એક એક્ટ્રેસ પણ કોરોનાથી સંક્રમિત થઈ છે. ટેલિવિઝન એક્ટ્રેસ અદિતિ ગુપ્તા કોરોનાથી સંક્રમિત થઈ છે. અદિતિએ હાલમાં જ એક એન્ટરટેઈનમેન્ટ પોર્ટલ સાથેની વાતચીતમાં આ વાતની પુષ્ટિ કરી છે. અદિતિએ જણાવ્યું છે કે, તે અસિપ્ટોમેટિક છે અને હાલ તો તે ઘરમાં જ સેલ્ફ-ક્વોરન્ટીન થઈ છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

સૂંઘવાની ક્ષમતા જતી રહી

‘ઈશ્કબાઝ’ સીરિયલની એક્ટ્રેસ અદિતિએ જણાવ્યું, “મારી સૂંઘવાની ક્ષમતા જતી રહેતા મેં મારી જાતને એક રૂમમાં બંધ કરી દીધી હતી. સેલ્ફ-ક્વોરન્ટીન થયા પછી મેં કોરોનાનો ટેસ્ટ કરાવ્યો હતો. મારો રિપોર્ટ પોઝિટિવ આવ્યો હતો. હું અસિમ્પ્ટોમેટિક હોવાથી રિપોર્ટ આવ્યા પછી મેં ઘરે જ ક્વોરન્ટીન થવાનું નક્કી કર્યું હતું. છેલ્લા 7-8 દિવસથી હું મારા ઘરના એક રૂમમાં બંધ છું.”

અદિતિએ કહ્યું- ગભરાશો નહીં

ફ્રેન્ડ્સ અને પતિ સાથે અદિતિ

અદિતિએ જણાવ્યું કે, તે ડૉક્ટરની સૂચના મુજબ તમામ બાબતોનું પાલન કરી રહી છે. હવે ધીમે-ધીમે તેની સૂંઘવાની ક્ષમતા પાછી આવી રહી છે. અદિતિએ કહ્યું કે, જ્યારે કોઈ કોરોના પોઝિટિવ થાય ત્યારે તેણે ગભરાવવાની જરૂર નથી. ચોક્કસ દવાઓ અને હકારાત્મક અભિગમથી આ બીમારીને હરાવી શકાય છે.

ધીમે-ધીમે સ્વસ્થ થઈ રહી છે અદિતિ

અદિતિએ કહ્યું, “મને મારા પતિ, પરિવાર અને ફ્રેન્ડ્સનો ખૂબ સપોર્ટ મળી રહ્યો છે. તેઓ સતત મારું ધ્યાન રાખી રહ્યા છે. હવે મારી સૂંઘવાની ક્ષમતા આંશિક રીતે પાછી આવી ગઈ છે. હું હજી 10 દિવસ સુધી ક્વોરન્ટીન રહીશ. હું યોગ્ય આહાર અને દવાઓ લઈ રહી છું. હું એટલું જ કહીશ કે આનાથી ગભરાશો નહીં. જો કે, શરૂઆતમાં હું થોડી ચિંતામાં મૂકાઈ હતી પરંતુ યોગ્ય દવાઓ અને હકારાત્મક અભિગમને કારણે હું સ્વસ્થ થઈ રહી છું. મારા સારા દિવસો પરત આવી રહ્યા છે અને હું સામાન્ય જીવન તરફ આગળ વધી રહી છું.”