ઈટાલીના આ સુંદર ગામમાં સાત દિવસ મફત રોકાઈ શકે છે ટૂરિસ્ટ્સ

ટૂરિઝમ માટે જાણીતું છે ઈટાલી

કોરોના વાયરસની ઈટાલી પર ભારે અસર થઈ હતી, ઈટાલીમાં કોરોના વાયરસના દર્દીઓ વધુ નોંધાયા હતા અને ઘણાં લોકોના કોરોનાને કારણે મોત થયા હતા. પણ, હવે ધીરે-ધીરે ઈટાલીમાં જનજીવન સામાન્ય થઈ રહ્યું છે અને સ્થિતિ થાળે પડી રહી છે. ટૂરિઝમ માટે જાણીતું ઈટાલી હવે ધીરે-ધીરે ટૂરિસ્ટ્સ માટે દરવાજા ખોલી રહ્યું છે. કોરોના વાયરસના કારણે ઈટાલીના ટૂરિઝમને ભારે નુકસાન થયું હતું, હવે સ્થિતિ સામાન્ય થતા ઈટાલી ટૂરિઝમ ઉદ્યોગને પ્રોત્સાહન આપવાના પ્રયાસ કરી રહ્યું છે.

ટૂરિસ્ટ્સને રહેવા માટે કોઈ ખર્ચો કરવો નહીં પડે

ઈટાલીના દક્ષિણમાં આવેલા San Giovanni (સેન જોવાની) નામના સુંદર ગામમાં ટૂરિસ્ટ્સને આકર્ષવા માટે એક ખાસ યોજના બહાર પાડવામાં આવી છે. જુલાઈથી ઓક્ટોબર સુધીમાં આ ગામમાં ફરવા આવી રહેલા ટૂરિસ્ટ્સને રહેવા માટે કોઈ ખર્ચો કરવો નહીં પડે. આ ગામમાં કુલ 550 લોકો રહે છે અને તેમણે સહમતિથી એવો નિર્ણય લીધો છે કે આ ગામમાં ફરવા આવી રહેલા ટૂરિસ્ટ્સને મફતમાં રહેવા માટેની વ્યવસ્થા કરી આપવામાં આવશે.

ટૂરિસ્ટ્સને મફતમાં રહેવા માટેની વ્યવસ્થા

ઈટાલીના San Giovanni નામના આ સુંદર ગામમાં રહેવા માટે યાત્રીઓને કોઈ ખર્ચો કરવો નહીં પડે. આ ગામમાં કેટલાંક એવા ઘર છે જે ઘણાં સમયથી ખાલી છે. આ યોજનાને ધ્યાનમાં રાખતા એ પ્રકારે નિર્ણય લેવામાં આવ્યો છે કે આ ઘરોને ફરી રહેવાલાયક તૈયાર કરીને ટૂરિસ્ટ્સ માટે રહેવાની વ્યવસ્થા કરવામાં આવે.

આટલા દિવસ સુધી મફતમાં રહી શકે છે

ટૂરિસ્ટ્સ આ ગામમાં સાત રાત્રિ મફતમાં રહી શકે છે. આ ગામમાં વધુ ટૂરિસ્ટ્સ આવે અને ત્યાંની સ્થાનિક અર્થવ્યવસ્થા મજબૂત થાય તે માટે આ નિર્ણય લેવાયો છે. હજારો ટૂરિસ્ટ્સે આ ગામમાં રહેવા માટે અરજી કરી હોવાનું જાણવા મળ્યું છે. સમગ્ર દુનિયામાંથી 2,000 કરતા વધારે અરજી મળી હોવાનું જાણવા મળ્યું છે. અહીંના વિલેજ એસોસિએશન દ્વારા amicidelmorrutto@gmail.com નામનો ઈમેઈલ આઈડી બહાર પાડવામાં આવ્યો છે. જે થકી તમે આ અંગેની વધુ જાણકારી મેળવી શકો છો. પરંતુ, આ ગામમાં ફરવા જવા માટેની અરજી કરતા પહેલા કોરોના વાયરસ સંબંધિત ઈટાલીની ટૂરિઝમ પોલિસી વિશે જાણવું જરૂરી છે.