અમેરિકામાં ચીનનો વિરોધ, ‘બોયકોટ ચાઈના’ના નારાથી ગુંજ્યું ટાઈમ્સ સ્ક્વેર

હવે અમેરિકામાં પણ ચીનનો ભારે વિરોધ

હવે ચીનનો વિરોધ અમેરિકામાં પણ પહોંચી ગયો છે. ન્યૂયોર્કના ટાઈમ્સ સ્ક્વેર ખાતે ભારતીય અમેરિકન, તિબેટ અને તાઈવાનના નાગરિકોએ ચીનનો ભારે વિરોધ કરતા વિરોધ પ્રદર્શન કર્યા હતા. આ દરમિયાન લોકોએ બોયકોટ ચાઈના અને સ્ટોપ ચાઈનિઝ અબ્યુઝ જેવા પોસ્ટર પણ લગાવ્યા હતા. બે દિવસ પહેલા શિકાગોમાં પણ ચીન વિરુદ્ધ જબરદસ્ત પ્રદર્શન થયા હતા.

ટાઈમ્સ સ્ક્વેર પર ભેગા થયા લોકો

ઐતિહાસિક ટાઈમ્સ સ્ક્વેર પર મોટી સંખ્યામાં ભારતીય-અમેરિકનોએ ચીન વિરુદ્ધ પ્રદર્શન કરતા ભારત માતા કી જય અને અન્ય દેશભક્તિના નારા લગાવ્યા હતા. આ ઉપરાંત તેમણે ભારત વિરુદ્ધ ચીનની આક્રમકતાને લઈને તેનો આર્થિક બહિષ્કાર કરવા અને તેને રાજકિય સ્તરે એકલું પાડી દેવાની માંગ કરી હતી.

બોયકોટ ચાઈનાથી ગુંજ્યુ ટાઈમ્સ સ્ક્વેર

ન્યૂયોર્ક અને ન્યૂજર્સીમાં રહેતા ભારતીયો અને ભારતીય સંઘોના પરિસંઘ (એફઆઈએ)ના અધિકારીઓએ બોયકોટ ચાઈના, ભારત માતા કી જય અને ચીનની આક્રમકતાને રોકો જેવા નારા લગાવ્યા હતા. પ્રદર્શનકારીઓએ કોરોના વાયરસ વૈશ્વિક રોગચાળાને ધ્યાનમાં રાખતા માસ્ક પહેરીને પ્રદર્શન કર્યું હતું. તેમના હાથમાં અમે શહીદ જવાનોને સલામ કરીએ છીએ તેવા પોસ્ટર હતા.

તિબેટ અને તાઈવાનના નાગરિકો પણ થયા સામેલ

પ્રદર્શનમાં તિબેટ અને તાઈવાનના લોકો પણ સામેલ હતા. તેમના હાથમાં તિબેટ ભારત સાથે છે, માનવાધિકારો, લઘુમતી સમુદાયોના ધર્મો, હોંગકોંગ માટે ન્યાય, ચીન માનવતા વિરુદ્ધ ગુના રોકે અને બોયકોટ ચાઈનાના પોસ્ટર હતા.

લોકોએ કહ્યું, ચીનને આપીશું જડબાતોડ જવાબ

જયપુર ફુટ યુએસના અધ્યક્ષ પ્રેમ ભંડારીએ કહ્યું હતું કે આજનું ભારત 1962ના ભારત કરતા અલગ છે. અમે ચીનની આક્રમકતા અને તેની આંતરરાષ્ટ્રીય દાદાગીરી સહન કરીશું નહીં. અમે ચીનના અહંકારનો જડબાતોડ જવાબ આપીશું. તેમણે કહ્યું છે કે ભારતીય સમુદાય પૂર્વ લદાખની ગલવાન ખીણમાં ચીનના સૈનિકો સાથે થયેલી હિંસક અથડામણમાં 20 ભારતીય જવાનો શહીદ થયા તેનાથી ઘણા દુઃખી છીએ.