પોલીસકર્મીએ કારને બનાવી એમ્બ્યુલન્સ, કોરોનાના દર્દીઓને વિના મૂલ્યે પહોંચાડે છે હોસ્પિટલ

કોરોના વાયરસ મહામારી દરમિયાન લોકોની માનવતાના દર્શન થઈ રહ્યા છે. પોલીસ સામાન્ય નાગરિકોની સેવા કરી રહી હોય તેવા ઘણા કિસ્સા સામે આવ્યા છે. હવે મુંબઈ પોલીસના એક કર્મીએ હૃદયસ્પર્શી કામ કર્યું છે. પોલીસ કોન્સ્ટેબલે મારુતિ ઓમની કારને એમ્બ્યુલન્સમાં પરિવર્તિત કરી છે. તેઓ કારમાં કોવિડ-19ના દર્દીઓને હોસ્પિટલ પહોંચાડવામાં મદદ કરે છે. આ પોલીસ કોન્સ્ટેબલનું નામ છે તેજેશ સોનવાણે અને હાલ તેઓ કફ પરેડ પોલીસ સ્ટેશનમાં ફરજ બજાવે છે. તેજેશ સોનવાણેએ કારને ‘કોવિડ એમ્બ્યુલન્સ’ તો બનાવી જ છે સાથે તેઓ દર્દીઓની હેરફેર કરવાનો પેટ્રોલ ખર્ચ પણ જાતે ભોગવે છે. તેઓ દર્દીઓને વિના મૂલ્યે હોસ્પિટલ પહોંચાડે છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

ટાઈમ્સ ઓફ ઈન્ડિયાના અહેવાલ પ્રમાણે, મુંબઈ પોલીસે કોન્સ્ટેબલની આ નિઃસ્વાર્થ સેવાની સરાહના કરી છે. મુંબઈ પોલીસે સોશિયલ મીડિયા અકાઉન્ટ પર કોન્સ્ટેબલનો વિડીયો પણ શેર કર્યો હતો. તેમણે લખ્યું, “હેલ્થકેર વર્કર્સ કોઈપણ રૂપમાં હોઈ શકે છે. કેટલાક એપ્રન પહેરે છે તો કેટલાક કફ પરેડ પોલીસ સ્ટેશનના પોલીસ કોન્સ્ટેબલ તેજેશ સોનવાણેની જેમ ખાખી પહેરે છે. તેઓ મેડિકલ સારવારની જરૂરિયાત ધરાવતા લોકોને પોતાની મોડિફાય કરેલી ‘ઓમની’ એમ્બ્યુલન્સમાં મફતમાં હોસ્પિટલ લઈ જાય છે.”

The ‘Omni’-Present COVID Warrior!

Healthcare workers come in all get-ups. Some wear aprons; while others, Khaki – just like PC Tejesh Sonawane from Cuffe Parade PStn.

He has been ferrying the needy to medical aid in his modified ‘Omni’-Ambulance for free.#AamhiDutyVarAahot pic.twitter.com/QX2f7nGVTm

— Mumbai Police (@MumbaiPolice) June 4, 2020

કોન્સ્ટેબલ તેજેશે આ વિશે વાત કરતાં કહ્યું, “મેં મારા ફ્રેન્ડ પાસે તેની કાર માગી હતી અને કહ્યું હતું કે હું તેને એમ્બ્યુલન્સમાં ફેરવવા માગુ છું. આ એવો સમય છે જ્યારે કોવિડ-19 ગમે ત્યારે ગમે તેના પર હુમલો કરી શકે છે. હું લોકોને તાત્કાલિક સેવા આપવા માગુ છું, કોઈપણ વ્યક્તિ પીડાય તેવું ઈચ્છતો નથી. માટે એમ્બ્યુલન્સ સર્વોત્તમ વિચાર છે. આ મુશ્કેલ સમયગાળામાં હું મેડિકલ ઈમર્જન્સી ધરાવતા લોકોને મદદ કરવા માગુ છું.”

તેજેશભાઈએ 4 જૂનથી આ સેવા શરૂ કરી છે. ત્યારથી અત્યાર સુધીમાં તેમણે 18 દર્દીઓને વિવિધ હોસ્પિટલોમાં પહોંચાડ્યા છે. આ સંકટ સમયમાં ગાડીને મોડિફાય કરાવવા માટે કોન્સ્ટેબલે પોતાના ખિસ્સામાંથી રૂપિયા ખર્ચ્યા છે. કોન્સ્ટેબલ તેજેશે કહ્યું, “વાહનને મોડિફાય કરવાની જરૂર હતી. મેં બે ભાગ પાડીને બે અલગ જગ્યા બનાવી છે. એક કોવિડ-19 દર્દી માટે અને બીજી તેના પરિજન માટે.”

કોન્સ્ટેબલે આગળ કહ્યું, “બસ આ વ્યવસ્થા કર્યા પછી પાછળ વળીને જોવાની જરૂર નથી પડી. મેં ઘણા દર્દીઓને હોસ્પિટલ પહોંચવામાં મદદ કરી છે. કોઈપણ એમ્બ્યુલન્સને ફોન કરે કે તરત જ પહોંચી જઈએ છીએ. એમ્બ્યુલન્સ માટેના મોટાભાગના ફોન ઓછી સુખ-સુવિધા ધરાવતા લોકો તરફથી જ આવે છે.” તેજેશ PPE કિટ પહેરીને જાતે જ શહેરભરમાં આ એમ્બ્યુલન્સ ચલાવે છે અને દર્દીઓની મદદ કરે છે.