કોરોનાઃ ભારતે રશિયાને પાછળ રાખ્યું, સૌથી વધુ કેસ મામલે વિશ્વમાં ત્રીજા ક્રમે પહોંચ્યું

ભારતે રશિયાને પાછળ રાખી દીધું

ભારતમાં કોરોના વાયરસના કેસની સંખ્યામાં સતત વધારો થઈ રહ્યો છે. કોરોના વાયરસના કુલ કેસની સંખ્યામાં ભારત હવે રશિયાને પાછળ રાખીને વિશ્વમાં ત્રીજા ક્રમે પહોંચી ગયું છે. ભારતમાં રવિવારે સાંજે કેટલાક રાજ્યોમાં મળેલા આંકડા બાદ કુલ કેસની સંખ્યા 6,90,000ને પાર થઈ ગઈ છે. અત્યાર સુધી 19,200થી વધુ લોકોના મોત થયા છે. જ્હોન હોપકિન્સ યુનિવર્સિટીના ડેટા પ્રમાણે રશિયામાં હાલમાં કોરોનાના કેસની સંખ્યા 6,80,283 છે.

હવે અમેરિકા અને બ્રાઝિલથી પાછળ

ભારત કોરોનાથી સૌથી વધારે અસરગ્રસ્ત દેશોની યાદીમાં હવે અમેરિકા અને બ્રાઝિલથી જ પાછળ છે. અમેરિકામાં કોરોનાના કેસની સંખ્યા 28,39,000થી વધારે છે. જ્યારે બ્રાઝિલમાં કોરોનાના કેસ 15,77,000 છે. અમેરિકામાં અત્યાર સુધી 1,29,600 લોકોના મૃત્યુ થયા છે. જ્યારે બ્રાઝિલમાં 64,000થી વધુ લોકોના મૃત્યુ થયા છે.

સતત બીજા દિવસે ભારતમાં કોરોનાના રેકોર્ડ કેસ

રવિવારે સતત બીજા દિવસે ભારતમાં કોરોનાના રેકોર્ડ કેસ નોંધાયા છે. સ્વાસ્થ્ય મંત્રાલય તરફથી દરરોજ સવારે આંકડા જાહેર કરવામાં આવે છે અને તે પ્રમાણે છેલ્લા 24 કલાકમાં 25,000 નવા કેસ નોંધાયા છે. જ્યારે 613 લોકોના મૃત્યુ થયા છે. આ એક દિવસમાં નોંધાયેલો અત્યાર સુધીનો સૌથી મોટો આંકડો છે.

મહારાષ્ટ્રમાં કેસ 2 લાખને પાર, દિલ્હીમાં 1 લાખ નજીક

મહારાષ્ટ્રમાં કોરોનાના કેસની સંખ્યા ઝડપથી વધી રહી છે અને ત્યાં કોરોનાના કુલ કેસની સંખ્યા 2 લાખને પાર થઈ ગઈ છે. મહારાષ્ટ્રમાં કોરોનના 2,06,619 કેસ નોંધાયા છે જ્યારે 8,822 લોકોના મૃત્યુ થયા છે. જ્યારે દિલ્હીમાં પણ કોરોનાના કેસની સંખ્યા 1 લાખને નજીક પહોંચવા આવી છે. દિલ્હીમાં કોરોનાના 99,444 કેસ નોંધાયા છે જ્યારે 3,004 લોકોના મૃત્યુ થયા છે. તામિલનાડુમાં 1.11 લાખ કેસ નોંધાયા છે અને 1,510 લોકોના મોત થયા છે.