અમદાવાદમાં આગામી અઠવાડિયાની શરુઆતમાં ભારેથી અતિભારે વરસાદની વકી

અમદાવાદઃ વાદળો ઘેરાઈ રહ્યા છે પણ વરસાદનું આગામન નથી થઈ રહ્યું ત્યારે અમદાવાદમાં તારીખ 6-7 દરમિયાન ભારે વરસાદ થવાની સંભાવના વ્યક્ત કરાઈ રહી છે. છત્તીસગઢમાં બનેલા લૉ-પ્રેશરની અસરના કારણે ભારે વરસાદ થવાની સંભાવના વ્યક્ત કરવામાં આવી રહી છે. સતત ગરમી અને અકળામણથી કંટાળેલા શહેરીજનો વરસાદની આતુરતાથી રાહ જોઈ રહ્યા છે. મહત્વનું છે કે, આ વર્ષે ચોમાસાની સારી શરુઆત થઈ છે જોકે, પાછલા કેટલાક સમયથી વરસાદ અટકી ગયો હોવાથી તાપમાનમાં સતત વધારો થઈ રહ્યો છે.

લૉ-પ્રેશર 5મી જુલાઈના રોજ બનવાની સંભાવના મીડિયા રિપોર્ટ્સમાં વ્યક્ત કરાઈ રહી છે ને તેની અસરના કારણે અમદાવાદમાં ભારેથી અતિભારે વરસાદની સંભાવના વ્યક્ત કરાઈ રહી છે. આ સાથે આ અઠવાડિયાના અંતમાં રાજ્યના સૌરાષ્ટ્ર અને દક્ષિણમાં ભારેથી અતિભારે વરસાદની સંભાવના વ્યક્ત કરવામાં આવી છે.

શનિવાર અને રવિવાર દરમિયાન દક્ષિણ ગુજરાતના સુરત, ભરુચ, તાપી, ડાંગ, વલસાડ, નવસારી, દમણ, દાદરા અને નગર હવેલીમાં અતિભારે વરસાદની સંભાવના વ્યક્ત કરાઈ છે. આજ રીતે સૌરાષ્ટ્રના જામનગર, જૂનાગઢ, અમરેલી, ભાવનગર, દ્વારકા, ગીર સોમનાથ અને દીવમાં અતિભારે વરસાદની થવાની સંભાવના વ્યક્ત કરાઈ છે.