અમદાવાદના યુવકે તૈયાર કરી તમામ સુવિધાઓથી સજ્જ સાઈડકાર એમ્બ્યુલન્સ

અમદાવાદ: એમ્બ્યુલન્સ ના મળી શકે તેવા દર્દીઓ માટે ટુ-વ્હીલર સાઈડકાર એમ્બ્યુલન્સ વરદાન સમાન સાબિત થઈ શકે છે. અમદાવાદના ટુ-વ્હીલર સાઈડકાર બનાવતા વ્યક્તિએ ટુ-વ્હીલર સાઈડકાર એમ્બ્યુલન્સની પ્રોટોટાઈપ તૈયાર કરી છે. સાઈડકાર બનાવનારે રાજસ્થાનના ડુંગરપુર જિલ્લાની સરકારી હોસ્પિટલના સત્તાધીશો સાથે આ અંગે વાત કરી છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

અમદાવાદના વિજય શક્તિ સાઈડકારે આ એમ્બ્યુલન્સ તૈયાર કરી છે. સાઈડકાર એમ્બ્યુલન્સમાં ઓક્સિજન સપ્લાય કિટ, સ્ટ્રેચર, તાપમાન અને બ્લડ પ્રેશર માપવાના સાધનો પણ ફિટ કરવામાં આવ્યા છે. સાઈરનવાળી ચારેબાજુથી બંધ આ એમ્બ્યુલન્સમાં દર્દી આરામથી બેસી શકે છે. રોયલ એનફિલ્ડ અને પલ્સર મોટરસાઈકલમાં તૈયાર કરાયેલી આ બે સાઈડકાર એમ્બ્યુલન્સને થોડા દિવસમાં ડુંગરપુર લઈ જવાશે.

ડુંગરપુર જિલ્લાની સરકારી હોસ્પિટલના મેડિકલ સુપ્રીટેન્ડન્ટ ડૉ. શ્રીકાંત આસવાએ કહ્યું, “કાચા રોડ હોય તેવા ગામડાઓમાં પહોંચવામાં એમ્બ્યુલન્સને તકલીફ પડે છે. સાથે જ એમ્બ્યુલન્સ સાંકડા રસ્તા પર ભારે ટ્રાફિક જામમાં ફસાઈ જવાના કારણે ઘણીવાર સમયસર પહોંચી શકતી નથી. ત્યારે આ સ્થિતિમાં અમે ટુ-વ્હીલર એમ્બ્યુલન્સ શરૂ કરવાની સંભાવના પર વિચાર કરતા હતા. અને આ માટે અમે અમદાવાદની કંપની સાથે મળીને ટુ-વ્હીલર પ્રોટોટાઈપ એમ્બ્યુલન્સ બનાવવા પર કામ કરી રહ્યા છીએ.”

ડૉ. શ્રીકાંતે આગળ કહ્યું, “એમ્બ્યુલન્સમાં જરૂરિયાત મુજબના ફેરફાર કરી શકાશે. હજી સુધી કાયમી આકાર આપ્યો નથી. અમે આ એમ્બ્યુલન્સમાં જીપીએસ ફિટ કરવાનું વિચારી રહ્યા છીએ. આ એમ્બ્યુલન્સ તૈયાર કરવા બાબતે હું સતત જિલ્લા કલેક્ટરના સંપર્કમાં છું.”

વિજય શક્તિ સાઈડકારના 39 વર્ષીય માલિક ઉપેન્દ્ર ચૌહાણે કહ્યું, “દર્દીઓ માટે આરામદાયક એમ્બ્યુલન્સ તૈયાર કરી છે. આમાં વેન્ટિલેશનની પણ પૂરતી સુવિધા છે. એક એમ્બ્યુલન્સમાં જરૂરી હોય તે તમામ વસ્તુઓ આમાં ફિટ કરવામાં આવી છે.”