સોનાના માસ્ક સાથે જે વ્યક્તિની તસવીર વાયરલ થઈ રહી છે તે છે કોણ?

કોરોનાથી બચવા માસ્ક જરુરી

ET online,નવી દિલ્હીઃ દુનિયામાં કોરોના વાયરસના ફેલાવાને અટકાવવા માટે માસ્ક અને સોશિયલ ડિસ્ટન્સિંગ જરુરી છે. આવામાં એક શખ્સે પહેરેલું સોનાનું માસ્ક સૌથી વધારે ચર્ચામાં છે. પરંતુ આ વ્યક્તિ કોણ છે તેના વિશે સૌ કોઈ જાણવા માગે છે. તો આવો અમે આપને જણાવીએ કે આ વ્યક્તિ કોણ છે.

સોના પ્રત્યેની ઘેલછા

ભારતમાં એવા લોકોની કોઈ જ કમી નથી કે જેઓ સોનું પહેરવાના શોખીન હોય. પુણેની પાસે રહેતા વ્યક્તિએ કોરોનાથી બચવા માટે સોનાનું માસ્ક બનાવડાવ્યું છે. સોનાના બનેલા આ માસ્કની કિંમત 2.89 લાખ રુપિયા છે. પુણે પાસે રહેતી આ વ્યક્તિને ગોલ્ડમેન તરીકે ઓળખવામાં આવે છે. એક રિપોર્ટ મુજબ આ માસ્ક દેશનું સૌથી મોઘું માસ્ક માનવામાં આવે છે.

ગોલ્ડન માસ્કના માલિક

પિંપરી ચિંચવાડમાં રહેતા શંકર કુરહાડેને સોનાનો ઘણો જ શોખ છે. તેમના ગળામાં, હાથમાં સોનાની મોટી-મોટી ચેન જોવા મળે છે. કુરહાડે સરેરાશ 3 કિલોગ્રામ સોનું પહેરી રાખે છે. સોના પ્રત્યેના લગાવના કારણે તેમને પોતાના માટે સોનાનું માસ્ક પણ બનાવડાવ્યું છે.

કેવી છે માસ્કની ડિઝાઈન?

કુરહાડે જણાવે છે, “સામાન્ય માસ્કની જેમ ભલે આ માસ્ક કોરોનાથી બચાવવામાં સક્ષમ ના હોય, પરંતુ આમાં નાના-નાના છીદ્રો છે, જેનાથી શ્વાસ સરળતાથી લઈ શકાય છે.” તેમણે એમ પણ જણાવ્યું કે તેમને નથી ખબર કે સોનાનું બનેલું માસ્ક કોરોનાથી બચાવવામાં સફળ છે કે નહીં.

માત્ર શોભા પૂરતું છે માસ્ક

હૈદરાબાદના જ્વલર્સ ગોલ્ડ ફેસ માસ્ક વેચવાના શરુ કરી દીધા છે. હૈદરાબાદના જાણીતા જ્વેલર ચેને આ ટ્રેન્ડની શરુઆત કરી હતી. આ સોનાના માસ્કની કિંમત લાખોમાં છે. જોકે, મોટાભાગના લોકોનું કહેવું છે કે, આ માસ્ક માત્ર દેખાડો છે. સોનાનું આ માસ્ક પહેરીને લગ્નમાં જઈ શકાય છે, પણ કોરોનાથી બચાવ માટે આ માસ્ક પુરતું નથી.