ફરવાના શોખીનો બેગ પેક કરો, ટૂરિસ્ટ્સ માટે ખુલી ગયું ગોવા

પણજી: બુધવારે ગોવા સરકાર દ્વારા ઘોષણા કરવામાં આવી છે કે, ગુરુવારથી ગોવા પ્રવાસીઓ માટે ખુલી જશે અને આશરે 250 જેટલી હોટલોને આ ઑપરેશન અંતર્ગત પરવાનગી આપવામાં આવી છે. આ હોટલો જેમણે સરકારને ટૂરિઝમ શરૂ કરવા માટે અરજી કરી હતી, તેઓ ફક્ત અગાઉથી બુકિંગ કરાવનારા લોકોને જ સ્વીકારશે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

ટૂરિઝમ મિનિસ્ટર મનોહર અજગાંવકરે જણાવ્યું હતું કે, ‘હોટલોને ગુરુવારથી બુકિંગ્સ માટેની મંજૂરી આપવામાં આવી છે. હવે એ જોવાનું રહ્યું કે, કેટલા બુકિંગ્સ આવે છે. લોકો પોતાના ઘરે બેસીને કંટાળી ગયા છે. હવે ટૂરિઝમને ફરી શરૂ કરવાની માગણી થઈ રહી છે.’

રાજ્યના સ્વાસ્થ્ય મંત્રી વિશ્વજીત રાણેએ જણાવ્યું કે, ટૂરિઝમ સેક્ટરે સોશિયલ ડિસ્ટન્સિંગ અને સ્ટ્રીક્ટ સ્ટાન્ડર્ડ ઑપરેટિંગ પ્રોસિજર (SOPs)નું પાલન કરવાનું રહેશે અને નિયમો તોડનાર વિરુદ્ધ એક્શન લેવામાં આવશે. ટૂરિસ્ટ્સ પાસે બે વિકલ્પ રહેશે, એક તો તેઓ ગોવા પહોંચવાના 48 કલાકની અંદર ICMR દ્વારા અપ્રૂવ કરવામાં આવેલી લેબમાંથી પોતાનો કોરોના નેગેટિવ રિપોર્ટ લાવી જમા કરાવે અથવા 2 હજાર રૂપિયા ચૂકવીને ગોવાની અંદર ટેસ્ટ કરાવે. જે હોટલ્સને શરૂ કરવાની પરમિશન આપવામાં આવી છે તેમની પાસે આઈસોલેશનની વ્યવસ્થા છે. જ્યાં સુધી ટેસ્ટનો રિપોર્ટ ન આવી જાય ત્યાં સુધી જે-તે વ્યક્તિ ત્યાં રહી શકે છે.

આ દરમિયાન રાણેએ જણાવ્યું કે, અર્થતંત્રનું ફરી ચાલુ થવું સમયની જરૂરિયાત છે. તેમણે કહ્યું, ‘લોકો નોકરી ગુમાવી રહ્યાં છે. આથી અમે દરેક પક્ષને જોઈ રહ્યાં છીએ અને હોટલો ખોલવાની મંજૂરી આપી છે.’ જણાવી દઈએ કે, ગોવા સરકાર માટે ટૂરિઝમ રેવેન્યૂનું સૌથી મોટું માધ્યમ છે. 2019માં 70 લાખથી વધુ ભારતીયોએ ગોવાની મુલાકાત લીધી હતી. 1985માં આ આંકડો 6.8 લાખ હતો.

હોટલ્સ ખોલી દેવામાં આવી છે પણ રેસ્ટોરન્ટમાં માત્ર ટેક-અવેની જ સુવિધા આપવામાં આવશે. બાર બંધ રહેશે. લોબો જેવા બારને ફરી ખોલવા માટે મંજૂરી અપાઈ છે. ટૂરિઝમ મિનિસ્ટરે કહ્યું કે, ગેરકાયદેસરના ઑપરેટર્સ માટે ધંધો શરૂ કરવો શક્ય નથી. ટૂરિઝમ ડિપાર્ટમેન્ટ સાથે રજિસ્ટર્ડ હોટલ્સને જ શરૂ કરવા માટે પરમિશન અપાઈ છે.