આ વખતના વીજ બિલમાં કંઈક લોચો હોવાની અમદાવાદીઓની ફરિયાદ

ઓજસ મહેતા, અમદાવાદ: લોકડાઉન દરમિયાનના મહિનાઓનું વીજ બિલ ઘણું વધારે આવ્યું હોવાની ફરિયાદો અમદાવાદીઓ કરી રહ્યા છે. ગરમ હવામાન કે પછી મીટર રિડિંગમાં કંઈક ભૂલ થઈ હોવાથી આવું બન્યું હોવાનું લોકોનું કહેવું છે. વીજ કંપનીનું કહેવું છે કે, મીટિર રિડિંગ શરૂ થઈ ગયું છે, એટલે આ બિલને ખરેખર જેટલી વીજળી વપરાઈ હશે તેની સામે એડજેસ્ટ કરી દેવાશે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial

શહેરના મકરબા વિસ્તારમાં સ્વાતિ ગાર્ડનિયામાં રહેતા સરકારી વિભાગમાં સીનિયર એન્જિનિયર ગૌરવ મકવાણાએ જણાવ્યું કે, ‘હું 13મા માળે રહ્યું છું અને ત્રણ બાજુ ખુલ્લી છે. હું ઘરમાં એટલી હવા આવે છે કે હું પંખો પણ ચાલુ નથી કરતો. ખાલી ફ્રીજ અને ટીવી માટે વીજળી વપરાય છે, તે સિવાય રાત્રે લાઈટ માટે.’

તેમના પત્ની સ્નેહા મકવાણાએ જણાવ્યું કે, ‘આ બિલમાં એ નથી જણાવાયું કે, તેની ગણતરી કઈ રીતે કરવામાં આવી છે. મારું માનવું છે કે, પહેલા 200 યુનિટનું ડિસ્કાઉન્ટ ગણતરીમાં નથી લેવાયું અને બધા યુનિટની ગણતરી કરી 200 યુનિટ કરતા વધારેના સ્લેબ મુજબ ચાર્જ લેવાયો છે.’

મકવાણાએ વધારે પડતા વીજ બિલ સામે ફેસબુક પર ‘રાઈઝ ધ વોઈસ’ નામનું અભિયાન શરૂ કર્યું છે અને તેમની બિલ્ડિંગના રહેવાસીઓને જો તેમનું બિલ વધારે આવ્યું હોવાનું લાગતું હોય તો અવાજ ઉઠાવવા આમંત્રણ આપ્યું છે.

મકવાણાએ કહ્યું કે, બિલ્ડિંગના સભ્યોને ચાર મહિનાનું 39,000 હજાર રૂપિયા વધારે બિલ આવ્યું છે. તેમણે કહ્યું કે, ટોરેન્ટ પાવર પહેલા 50 યુનિટ માટે 3.20 રૂપિયા, બીજા 150 યુનિટ માટે 3.90 રૂપિયા અને બાકીના યુનિટ માટે 4.90 રૂપિયા ચાર્જ કરે છે.

મકરબામાં જ રહેતા સુમિત રાઠોડે જણાવ્યું કે, ‘મારા ઘરનું લાઈટ બિલ 5,120 રૂપિયા આવ્યું છે. જ્યારે અગાઉ મેં 2,010 રૂપિયા બિલ ચૂકવ્યું હતું. હાલનું બિલ અગાઉના બિલ કરતા બેગણા કરતા વધારે છે. મારું અમૂલ પાર્લર પણ છે, જેનું ચાર મહિનાનું બિલ 16,000 રૂપિયા આવ્યું છે. મારા પાર્લરનું બે મહિનાનું બિલ મોટાભાગે 3,000 થી 4,000ની વચ્ચે આવે છે. આ બિલ અગાઉના બિલ કરતા બેગણા કરતા વધારે છે.’

શાહીબાગામાં પોલીસ કમિશનર કચેરી પાસે ડોલ્ફિન ક્લબ ચલાવતા મહેશ ત્રિપાઠીએ જણાવ્યું કે, લોકડાઉન દરમિયાન ક્લબ બંધ હોવા છતાં તેમને ટોરેન્ટે બિલ આપ્યું છે. તેમણે કહ્યું કે, ક્લબ બંધ હોવા છતાં ટોરેન્ટ કંપનીએ તેમને (લોકડાઉન દરમિયાનના) દરેક મહિનાનું રૂ. 10,000નું બિલ આપ્યું છે.

ત્રિપાઠીએ કહ્યું કે, ‘મેં વીજ કંપનીની ઓફિસે ફોન કર્યો હતો અને તેમણે મને મીટર રીડિંગ થયા બાદ એડજેસ્ટ કરી દેવાની ખાતરી આપી બિલ ભરી દેવા કહ્યું. મીટર રીડિંગ થયું અને મને 38,000 રૂપિયા ભરવાનો મેસેજ આવ્યો.’

કાળુપુર ટંકાશાળ એસોસિએશનના પ્રમુખ લક્ષ્મીચંદ અસ્વાણીએ જણાવ્યું કે, ‘મારા ઘરનું વીજ બિલ 1,500 રૂપિયા આવ્યું છે, જે હોવું જોઈએ તેના કરતા વધારે છે. મારું માનવું છે કે, છેલ્લા ચાર મહિનાનું એડજેસ્ટમેન્ટ આટલું બધું વધારે ન હોવું જોઈએ.’

દરમિયાનમાં, વેજલપુરના રહેવાસીઓએ વધારે પડતા વીજ બિલના વિરોધમાં બુધવારે ટોરેન્ટ ઓફિસ સામે દેખાવો કર્યા હતા. લોકડાઉન દરમિયાન કામકાજ બંધ રહ્યું હોવાથી લોકોએ બિલ માફ કરવા સરકારને વિનંતી કરી છે. બુધવારે આમ આદમી પાર્ટીએ પણ શાહીબાગમાં ટોરેન્ટની ઓફિસ સામે વધારે પડતા બિલ સામે વિરોધ પ્રદર્શન કર્યું હતું. પાર્ટીના શહેર પ્રમુખ આઝમ ખાને જણાવ્યું કે, ‘અમારો વિરોધ વિધારે બિલ સામે છે. મોટાભાગના અમદાવાદીઓ લોકડાઉન દરમિયાન ઘરમાં જ હતા અને કોઈ કમાણી ન હતી અને સેવિંગમાંથી ખર્ચ કરવો પડ્યો. અમારી માગ છે કે રાજસ્થાન અને મધ્ય પ્રદેશની જેમ શહેરમાં વીજ બિલ માફ કરવું જોઈએ.’

ટોરેન્ટ પાવરના પ્રવક્તાએ જણાવ્યું કે, ‘કોરોનાના કારણે મીટર રીડિંગ બંધ હતું. રહેણાંક અને બિન-રહેણાંક ગ્રાહકોને તેમનું મીટર રીડિંગ મોબાઈલ એપ દ્વારા આપવાનો ઓપ્શન અપાયો હતો, જેની ન્યૂઝ પેપરમાં જાહેરાત આપીને અને SMSથી કરવામાં આવી હતી’ તેમણે કહ્યું કે, જે ગ્રાહકો રીડિંગ ન આપી શક્યા તેમને ગુજરાત રેગ્યુલેટરી સપ્લાય કોડની જોગવાઈ મુજબ અગાઉના ત્રણ બિલનું સરેરાશ બિલ આપવામાં આવ્યુ. તેમણે જણાવ્યું કે, ગ્રાહકોને જાણ કરવામાં આવી છે કે, આ બિલ ખરેખર વપરાશ કરાયેલી વીજળીના રીડિંગ સામે એડજેસ્ટ કરી દેવાશે.

પ્રવક્તાએ વધુમાં સ્પષ્ટતા કરી કે, એવી ગેરસમજ પ્રવર્તે છે કે, અંદાજિત રીડિંગના આધારે અપાયેલું બિલ ઘણું વધારે છે કેમકે અગાઉના ત્રણ મહિના ઠંડી હતી. તેમણેએ કહ્યું કે, ‘ઉનાળાના મહિનાઓમાં લોકડાઉન દરમિયાન મોટાભાગના ગ્રાહકો ઘરમાં હતા અને વધારે વીજળી વપરાઈ, જેના કારણે એવી ગેરસમજ ઊભી થઈ કે બિલ વધારે આવ્યું છે.’ તેમણે વધુમાં સ્પષ્ટતા કરી કે, દરેક બિલ સાઈકલને ધ્યાનમાં લીધા વિના દરેક બિલમાં સ્લેબનો લાભ આપવામાં આવે છે.