પૂરો પગાર નહીં મળતા નૂડલ્સના પેકેટ્સ વેચી કમાણી કરી રહ્યા છે શિક્ષકો

બેંગલુરુ: બેંગલુરુની પ્રાઈવેટ સ્કૂલના 12 શિક્ષકો હાલ લોકોના ઘરે-ઘરે જઈને નૂડલ્સના પેકેટ વેચીને પરિવારનું ગુજરાન ચલાવી રહ્યા છે. કોરોના વાયરસના કારણે છેલ્લાં ઘણાં મહિનાઓથી સ્કૂલ બંધ છે, આ શિક્ષકોને છેલ્લાં 3 મહિનાથી પૂરો પગાર મળ્યો નથી. આ કારણે હવે શિક્ષકો આર્થિક તંગીનો સામનો કરી રહ્યા છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

આ શાળાના માલિક એક ફેક્ટરી ધરાવે છે કે જેમાં તેઓ નૂડલ્સ તૈયાર કરવાના મશીન બનાવે છે. તેમણે નૂડલ્સ અને પાસ્તા બનાવતા ગ્રાહકને કહ્યું કે તમે અમારી શાળાના શિક્ષકોની કેવી રીતે મદ કરી શકો. હવે અમારી શાળાના શિક્ષકો ઘરે-ઘરે જઈને આ નૂડલ્સ અને પાસ્તાના પેકેટ્સ વેચી રહ્યા છે. આ શિક્ષકો તેમના સંબંધી, મિત્રો, પાડોશીઓ અને વિદ્યાર્થીઓના ઘરે જઈને નૂડલ્સ-પાસ્તાના પેકેટ્સનું વેચાણ કરી રહ્યા છે. એક શિક્ષકે જણાવ્યું કે હું દરરોજ નૂડલ્સ અને પાસ્તાના આશરે 20 પેકેટ્સનું વેચાણ કરુ છું.

કર્ણાટકમાં ઘણાં શિક્ષકો હવે પરિવારનું ગુજરાન ચલાવવા માટે વૈકલ્પિક વ્યવસાય અથવા નોકરી કરી રહ્યા હોવાનું જાણવા મળ્યું છે. બેંગલુરુના એક શિક્ષકને આશરે છેલ્લા 4 મહિનાથી પગાર નહીં મળતા હવે તેઓ એક રેસ્ટોરન્ટમાં સામાનની હેરફેર કરવાનું કામ શરૂ કરવા જઈ રહ્યા છે. આ શિક્ષકે જણાવ્યું કે તેઓ હવે કોઈપણ કામ કરવા તૈયાર છે કારણકે છેલ્લા 4 મહિનાથી પગાર મળ્યો નથી.

લોકડાઉનના કારણે ચિત્રકામ વિષયના શિક્ષકો પણ આર્થિક તંગીનો સામનો કરી રહ્યા છે. એક શિક્ષકે હોસ્પિટલ્સ, મંદિરો અને રેલવે સ્ટેશન પર કોરોના વાયરસ અંગેની જાગૃતિ ફેલાવતા ચિત્રો દોરવાનું શરૂ કર્યું છે. જ્યારે અન્ય એક શિક્ષિકાએ હાલ દરજીકામ શરૂ કર્યું હોવાનું જાણવા મળ્યું છે. તેણે જણાવ્યું કે હું એક પ્રાઈવેટ શાળામાં શિક્ષિકા તરીકેની નોકરી કરતી હતી પણ હાલ શાળા બંધ છે. મારા પતિનો પગાર પણ અડધો થઈ ગયો છે એટલે મેં દરજીકામ શરૂ કર્યું છે.