અમદાવાદ: સીટીએમ આસપાસના વિસ્તારમાં પોલીસ હોવાનું કહી તોડબાજી કરતો શખસ ઝડપાયો

સરફરાઝ શેખ, અમદાવાદઃ રામોલ પોલીસે શનિવારે નકલી પોલીસને ઝડપી પાડી છે. રામોલ પોલીસે બાપુનગરના ઐયુબસા દિવાનની ધરપકડ કરી છે જે નકલી પોલીસ બનીને લોકો પાસેથી રૂપિયા પડાવતો હતો. રામોલ પોલીસ સ્ટેશનના કેએસ દવેએ જણાવ્યું છે કે 26 વર્ષીય દિવાને પોલીસ સામે તે પણ સ્વીકાર્યું છે કે નકલી પોલીસ બનીને લોકો પાસેથી રૂપિયા પડાવવાના કામમાં તેની સાથે તેના બે સાથી યાસિન કુરૈશી અને સલિમ રાજપૂત પણ રહેતા હતા.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

ઈન્સપેક્ટર દવેએ કહ્યું હતું કે પોલીસે આરોપીને કોરોના વાયરસના ટેસ્ટ માટે મોકલ્યો છે અને બાદમાં તેની સત્તાવાર ધરપકડ કરવામાં આવશે. હાલમાં પોલીસ તેના બે સાથીદારને શોધી રહી છે અને ઝડપથી તેમને પકડી પાડવામાં આવશે.

પોલીસના જણાવ્યા પ્રમાણે 35 વર્ષીય વ્યક્તિએ રામોલ પોલીસ સ્ટેશનમાં એક સપ્તાહ પહેલા ફરિયાદ નોંધાવી હતી કે જ્યારે તે પોતાની ગર્લફ્રેન્ડને મળીને સીટીએમ ક્રોસ રોડ તરફથી આવી રહ્યો હતો ત્યારે બે અજાણ્યા વ્યક્તિઓએ પાછળથી બાઈક પર આવ્યા હતા અને તેને અટકાવ્યો હતો.

તે બંનેએ તેને કહ્યું હતું કે તેઓ પોલીસ છે અને તેઓ જાણે છે કે તે ક્યાંથી આવ્યો છે. જો તે તેમને 75,000 રૂપિયા નહીં આપે તો તે તેની વિરુદ્ધ કેસ દાખલ કરશે અને સમાજમાં તેને બદનામ કરશે. ડરના કારણે તે વ્યક્તિએ એટીએમમાંથી રૂપિયા 10,000 કાઢ્યા હતા અને તેમને આપ્યા હતા. ત્યારબાદ બીજા દિવસે પણ 15,000 રૂપિયા આપ્યા હતા. જોકે, બાદમાં તેને બંને વ્યક્તિ અંગે શંકા થઈ હતી અને તેણે અમારો સંપર્ક કર્યો હતો. અમે તેની એફઆરઆઈ દાખલ કરી હતી અને તે બંનેને પકડી પાડવા એક ટીમ બનાવી હતી, તેમ રામોલ પોલીસ સ્ટેશનના એક સિનિયર અધિકારીએ જણાવ્યું હતું.

પોલીસ સૂત્રોએ જણાવ્યું હતું કે, ઈન્સપેક્ટર દવેને બાતમી મળી હતી કે તે બંને વ્યક્તિ સીટીએમ રોડ પર તે જગ્યાએથી જ પસાર થવાના છે. સર્વેલન્સ સ્ક્વોડના પીએસઆઈ બીબી સોલંકી સાથે અમે ઝડપથી રોડ પર વોચ ગોઠવી દીધી હતી. થોડા જ સમયમાં જે પ્રમાણેનું વર્ણન કરાયું હતું તે વ્યક્તિ બાઈક પર નીકળ્યો હતો. અમે તેને અટકાવ્યો હતો. તેણે પોતાની ઓળક ઐયુબસા દિવાન તરીકે આપી હતી. તેને પોલીસ સ્ટેશને લાવવામાં આવ્યો હતો જ્યાં પૂછપરછ દરમિયાન તે ભાંગી પડ્યો હતો અને ગુનો સ્વીકારી લીધો હતો કે તે અને તેના બે મિત્રો કુરેશી અને રાજપૂત લોકો પાસેથી રૂપિયા પડાવે છે, તેમ ઈન્સપેક્ટર કેએસ દવેએ જણાવ્યું હતું.