જાહેરમાં દારુ પીતા ઝડપાયા નરોડાના ASI, નશામાં કેમેરા સામે કર્યો લવારો

ગુજરાતમાં જાણે દારુબંધીના કાયદાના રક્ષક જ તેના ભક્ષક બની ગયા હોય તેવા દ્રશ્યો અમદાવાદના નિકોલ વિસ્તારમાં જોવા મળ્યા હતા. નરોડા પોલીસ સ્ટેશનમાં ફરજ બજાવતા એક ASI જાહેરમાં જ દારૂ પી રહ્યા હતા. જેનો એક વ્યક્તિએ વિડીયો બનાવી લીધો હતો. ચોંકાવનારી વાત એ છે કે, વિડીયો બનાવનારાએ જ્યારે ASIને પૂછ્યું કે જાહેરમાં કેમ દારુ પીવો છો? તો જવાબમાં ASIએ કહ્યું કે તેમાં શું વાંધો છે? દારુ ના પીવું તો શું બાયલો બનીને ઘરમાં બેસી રહું?

વિડીયો બનાવનારાએ જ્યારે આઈકાર્ડ માગ્યું ત્યારે ASIએ બેધડક તેને પોતાના પાકિટમાંથી કાઢીને બતાવતા કહ્યું કે જાઓ જઈને મિડીયામાં બતાવી દેજો, અને મારું નામ જીતેન્દ્ર પાટિલ છે, અને નરોડા પોલીસ સ્ટેશનમાં ASI છું. નશામાં ચૂર ASIએ ઈંગ્લિશમાં પણ લવારો કરતા કહ્યું હતું કે હું તમને થોડા ટાઈમ પછી મળીશ.

ASIએ લાજવાને બદલે ગાજવાનું શરુ કરતા એમ પણ કહ્યું હતું કે 38 વર્ષથી મેં વટથી નોકરી કરી છે. હાર્ટનો પ્રોબ્લેમ થઈ ગયો એટલે સાહેબે આરામ કરવાનું કહ્યું છે. ASI નશામાં એ હદે હતા કે તેમણે અમિત શાહનો ભત્રીજો મને સારી રીતે ઓળખે છે તેવો પણ દાવો કર્યો હતો.