યુપી: ગાઝિયાબાદમાં પેન્સિલ બોંબ બનાવતી ફેક્ટરીમાં આગ, 8ના મોત

ગાઝિયાબાદ: ઉત્તર પ્રદેશના ગાઝિયાબાદ જિલ્લામાં એક પેન્સિલ બોંબ બનાવતી ફેક્ટરીમાં ભીષણ આગ લાગી ગઈ છે. આગની ઝપેટમાં આવી જવાથી 8 લોકોના મોત થઈ ગયા છે. મૃતકોમાં 6 મહિલાઓ અને એક બાળક છે. ઘણા અન્ય લોકો ઘાયલ પણ થયા છે, જેમને હોસ્પિટલમાં ખસેડાયા છે. આગ પર કાબુ મેળવવા માટે ફાયર બ્રિગેડની ટીમ ઘટનાસ્થળે પહોંચી ગઈ છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial

જણાવાઈ રહ્યું છે કે, ગાઝિયાબાદના મોદી નગરમાં આવેલી આ ગેરકાયદેસર ફેક્ટરીમાં બર્થ-ડે કેક પર લગાવાતા પેન્સિલ બોંબ અને મીણબત્તી બનાવાય છે. ફેક્ટરીમાં મહિલાઓ અને બાળકો પણ કામ કરે છે, એ જ કારણ છે કે, મૃતકોમાં સાત મહિલાઓ અને બાળકો છે.

ચીફ ફાયર સેફ્ટી ઓફિસર સુનીલ કુમાર સિંહે જણાવ્યું કે, લગભગ 4 વાગ્યાની આસપાસ અહીં આગ લાગી. અંદર કામ કરી રહેલા લોકો બહાર ન નીકળી શક્યા. દાઝી જવાથી આ લોકોના ઘટનાસ્થળે જ મોત થઈ ગયા. ફેકટરી માલિકનું નામ નિતીન હોવાનું જણાવાઈ રહ્યું છે.

ઘાયલોની ઓળખ હજુ સુધી થઈ શકી નથી. આસપાસના લોકોએ જણાવ્યું કે, ગામમાં જ આ ફેક્ટરી ચાલી રહી હતી. આસપાસના લોકો જ આ ફેક્ટરીમાં આવીને કામ કરતા હતા.