મહારાષ્ટ્રમાં કોરોનાના રેકોર્ડ 7074 નવા કેસ, કુલ કેસ બે લાખને પાર

મહારાષ્ટ્રમાં સતત વધી રહ્યા છે કોરોનાના કેસ

મહારાષ્ટ્રમાં રાજ્ય સરકારના તમામ પ્રયાસો છતાં કોરોના વાયરસના કેસની સંખ્યા ઘટવાનું નામ નથી લઈ રહ્યા. છેલ્લા 24 કલાકમાં રાજ્યમાં રેકોર્ડ 7,074 કેસ નોંધાયા છે. આ સાથે કોરોનાથી 295 લોકોના મૃત્યુ થયા છે. હવે મહારાષ્ટ્રમાં કોરોના વાયરસનાના કુલ કેસની સંખ્યા 2,00,064 થઈ છે. અત્યાર સુધી રાજ્યમાં કુલ 8,671 લોકોના કોરોનાથી મૃત્યુ થયા છે.

મહારાષ્ટ્રમાં મુંબઈ સૌથી વધારે અસરગ્રસ્ત

3 જૂલાઈના રોજ મહારાષ્ટ્રમાં દર્દીઓની કુલ સંખ્યા 1,92,000 હતી. રાજ્યમાં એક્ટિવ દર્દીઓની સંખ્યા 83,295 છે. મુંબઈમાં કુલ દર્દીઓની સંખ્યા 83,237 થઈ ગઈ છે જ્યારે 4,830 લોકોના મૃત્યુ થયા છે. જોકે, રાજ્યમાં શનિવારે 3,395 દર્દીઓ સાજા થઈને ઘરે પરત ફર્યા છે. અત્યાર સુધી સાજા થનારા દર્દીઓની કુલ સંખ્યા 1,08,082 સુધી પહોંચી ગઈ છે.

રિકવી રેટ 54.02 ટકા

શનિવાર સુધીમાં સમગ્ર રાજ્યમાં 10,80,975 લોકોના નમૂનામાંથી 2,00,064 (18.51 ટકા) લોકોનો રિપોર્ટ પોઝિટિવ આવ્યો છે. હાલમાં સમગ્ર રાજ્યમાં 5,96,038 લોકો હોમ ક્વોરેન્ટિન થયા છે. આ સાથે જ સમગ્ર રાજ્યમાં 41,566 લોકોને ઈન્સ્ટિટ્યુશનલ ક્વોરેન્ટિનમાં રાખવામાં આવ્યા છે. સ્વાસ્થ્ય વિભાગના રિપોર્ટ પ્રમાણે 4 જૂલાઈએ મહારાષ્ટ્રમાં રિકવરી રેટ 54.02 છે. જ્યારે મૃત્યુ દર 4.33 ટકા છે.

પુણેના મેયરને પણ કોરોના

પુણેના મેયર મુરલીધર મોહોલનો કોરોના ટેસ્ટ પોઝિટિવ આવ્યો છે. તેમણે પોતાના ટ્વિટર એકાઉન્ટ પર આની જાણકારી આપી છે. તેમણે લખ્યું છે કે, તેમને થોડો તાવ આવ્યો હતો. ટેસ્ટ કરાવતા તેમને કોરોના હોવાનું સામે આવ્યું છે. તેમણે પોતાના સમર્થકોને વિશ્વાસ અપાવ્યો છે કે તેઓ ઝડપથી સાજા થઈને આવશે. હાલમાં તેમની સારવાર ચાલી રહી છે.