આ 6 બાબતો તમને નકલી મોટર ઈન્શ્યોરન્સથી બચાવશે

મોટર વીમા બાબતે લોકોમાં જાગૃતિનો છે અભાવ

વીમાની લેવડ-દેવડની પ્રક્રિયા અવાર-નવાર કોઈ થર્ડ પાર્ટી સર્વિસ પ્રોવાઈડર પર નિર્ભર હોય છે. એ જ કારણે છેતરપિંડી કરનારા અને તેમના નેટવર્કની ચુંગાલમાં ફસાવવાની શક્યતા વધી જાય છે. મોટર વીમા બાબતે લોકોમાં જાગૃતિનો ઘણો અભાવ છે, એટલે લોકો આવા લેભાગુઓની જાળમાં સરળતાથી ફસાઈ જાય છે. હવે નવા નિયમો મુજબ, ટુ-વ્હીલર માટે પાંચ વર્ષ માટે અને કાર માલિકો માટે ત્રણ વર્ષ માટે થર્ડ પાર્ટી પોલિસી લેવાનું ફરજિયાત કરી દેવાયું છે. એવામાં વાહન વીમાનું પ્રીમિયમ ઘણું વધી ગયું છે. આ નવી સ્થિતિએ છેતરપિંડી કરનારાઓ વીમા ધારકોને છેતરવા માટે એક તક આપી દીધી છે અને તે ઓછામાં ઓછા પ્રીમિયમની લલચામણી ઓફર આપીને વાહનના માલિકોને પોતાની જાળમાં ફસાવી લે છે. બજાજ એલાયન્સ જનરલ ઈન્શ્યોરન્સમાં ઈન્વેસ્ટિગેશન એન્ડ લોસ મિટિગેશન ટીમના ચીફ સંજીવ દ્વિવેદી જણાવી રહ્યા છે નકલી પોલિસીથી બચવાની 6 જરૂરી રીતો…

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial

સીધો વીમા કંપનીનો સંપર્ક કરો

વીમો કરાવનારા ગ્રાહકે પોલિસી ખરીદતી વખતે સીધો વીમા કંપનીનો જ સંપર્ક કરવો જોઈએ અને પોલિસી તથા તેની ઓફરની જાણકારી લેવી જોઈએ. એવું કરવા માટે ગ્રાહક કંપનીને ઈમેલ પણ કરી શકે છે કે પછી તેના કસ્ટમર કેર નંબર પ સંપર્ક કરી અથવા તેની વેબસાઈટ પરથી પોલિસી અને તેની શરતોની ખરાઈ કરી શકે છે.

પ્રીમિયમ ચૂકવણીની રસીદ

વીમા ગ્રાહકે ચૂકવાયેલી પ્રીમિયમની અસલી રસીદની માગ કરવી જોઈએ. એટલું જ નહીં, દરેક પ્રીમિયમ ચૂકવણીની રસીદ પોતાની પાસે રાખવી જોઈએ. પોલિસીમાં ક્યાંય કોઈ ગરબડ થાય છે તો પ્રીમિયમ ચૂકવણીની રસીદ ઘણી કામ આવે છે.

ક્યુઆર કોડ

આજકાલ બધી વીમા પોલિસી ક્યુઆર કોડ સાથે આવે છે. આ ક્યુઆર કોડ વીમા પોલિસીની પ્રામાણિકતાને સાબિત કરવા માટે ઉપયોગમાં લેવાય છે. તેનો ઉપયોગ કરવા માટે ક્યુઆર વાંચી શકતી એપ્લિકેશનને મોબાઈલ ફોનમાં ડાઉનલોડ કરી તેના કોડની ઈમેજને સ્કેન કરવામાં આવે છે.

વીમા પોલિસીને ધ્યાનપૂર્વક વાંચો

કોઈપણ પોલિસી ખરીદતી વખતે ગ્રાહકે થોડો સમય કાઢીને તેને ધ્યાનથી વાંચવી જોઈએ. પોલિસી ખરીદતા પહેલા પોલિસીના નિયમો, શરતો અને તેમાં કવર થનારી બાબતોને ધ્યાનપૂર્વક વાંચવી જોઈએ.

વચેટિયાઓથી બચવાનો પ્રયાસ કરો

છેતરપિંડી કરનારાઓની ચુંગાલથી બચવાની સૌથી સારી રીત છે કે વીમા ગ્રાહક કોઈ પોલિસીને સીધી કંપની કે તેના પ્રમાણિત એજન્ટો પાસેથી જ ખરીદે. આજકાલ લગભગ બધી કંપની ઓનલાઈન પણ પોલિસી વેચે છે. એટલે ઓનલાઈન પણ તમે પોલિસી ખરીદી શકો છો.

કેશમાં ચૂકવણી ન કરો

વીમા ગ્રાહકે પ્રીમિયમ હંમેશ ચેક, ક્રેડિટ કાર્ડ કે પછી ઓનલાઈન જ ભરવું જોઈએ. એવું એટલા માટે કે, જેથી એ રૂપિયા સીધા વીમા કંપનીના અકાઉન્ટમાં જ જમા થાય. ઘણી વખત એવા કિસ્સા જોવા મળ્યા છે કે, કેશમાં કરાયેલી ચૂકવણી વીમા કંપની પાસે પહોંચતી નથી.