ચાઈનીઝ એપ પછી હવે 5G, AC અને TV મુદ્દે ચીનને શોક આપવાની તૈયારીમાં સરકાર

એપ્સ બાદ હવે 5G, AC અને TVનો વારો

નવી દિલ્હીઃ સરકારે ચીનને એક પછી એક ઝટકા આપવાનું શરું કરી દીધું છે. પહેલા ચાઈનીઝ કંપનીઓ પાસેથી કોન્ટ્રાક્ટ અને ટેન્ડર પરત ખેચી લીધા બાદ ગઈકાલે ચાઈનીઝ કંપનીઓની એપ પર પ્રતિબંધ મૂકી દીધો હતો. જે બાદ હવે સરકાર 5G ટેક્નોલોજીમાં ચાઈનિઝ કંપનીઓના ઈક્વિપમેન્ટના ઉપયોગને પ્રતિબંધિત કરવા અંગે ટોચના સ્તરે ચર્ચા કરી રહી છે. કેન્દ્ર સરકારના ટોચના મંત્રીઓએ સોમવારે આ અંગે પણ ચર્ચા કરી હતી. જ્યારે ચીનની 59 જેટલી એપ પર પ્રતિબંધ મુકવામાં આવ્યો હતો. આ કંપનીઓ પર લોકોની જાસૂસી કરવાનો અને લોકાના ડેટાને ગેરકાયદે ચીનમાં મોકલી આપવાનો આરોપ મૂકવામાં આવ્યો છે.

હુવાઈ અને અન્ય ચીની ટેક્નોલોજી કંપનીઓ પર પ્રતિબંધ

જોકે આ મામલે વિગતવાર માહિતી ઉપલબ્ધ નથી પરંતુ અમારા સહયોગી ટાઈમ્સ ઓફ ઇન્ડિયા સાથે વાત કરતા સમગ્ર મામલે જાણકારી રાખનાર સૂત્રોએ માહિતી આપી કે ચાઈનીઝ ટેક્નોલોજી કંપની હુવાઈ અને અન્ય કંપનીઓ ચર્ચાના કેન્દ્રમાં છે. મહત્વનું છે કે આ વર્ષની શરુઆતમાં 5G સ્પેક્ટ્રમની હરાજી કોરોના વાયરસ મહામારીના કેસ વુહાનમાં મળ્યા પછી અને આ પ્રક્રિયામાં સામેલ અન્ય પ્રતિસ્પર્ધી કંપનીઓ વોડાફોન-આઈડિયાની નબળી આર્થિક પરિસ્થિતિને ધ્યાને લઈને એક વર્ષ માટે ટાળી દેવામા આવી છે.

ચીની સેના સાથે હુવાઈનું કનેક્શન

હુવાઈ પર અમેરિકામાં ટ્રમ્પ એડમિનિસ્ટ્રેશને બેન મૂકી દીધો છે. તેવું જ અમેરિકન ઓથોરિટી પોતાના બીજા વેપાર ભાગીદાર દેશો યુકે અને ભારતને કરવા માટે પ્રોત્સાહિત કરી રહ્યા છે. હુવાઈ આ કંપની હંમેશાથી ચાઈનીઝ આર્મી સાથે પોતાના સંસ્થાપકના સંબંધોને લઈને ચર્ચામાં રહી છે.

ચીનથી ઈમ્પોર્ટ માટે લાઈસન્સની તૈયારી

આ ઉપરાંત સરકાર 10-12 પ્રોડક્ટમાં લાઇસન્સિંગ કરવાનું પણ વિચારી રહી છે. સરકાર આ અંગે ઘણા સમયથી વિચારી રહી છે પરંતુ હાલમાં ચીન દ્વારા શરું કરવામાં આવેલ તણાવ બાદ આ કાર્યમાં ઝડપ કરવામાં આવી છે. શરુઆતમાં આ ફક્ત અગરબત્તી, ટાયર અને પામ ઓઇલ જેવી પ્રોડક્ટ માટે હતું પરંતુ હવે AC અને ટીવી જેવી મહત્વપૂર્ણ પ્રોડક્ટને પણ આ લિસ્ટમાં સામલ કરાઈ છે.

કઈ-કઈ વસ્તુઓનું ઇમ્પોર્ટ ઓછું કરવાની તૈયારી

સરકારનું ફોકસ એરકંડિશન અને તેના સ્પેરપાર્ટ્સનું ઇમ્પોર્ટ ઓછું કરવા પર છે જેથી ડોમેસ્ટિક પ્રોડક્શન વધારી શકાય. આ ઉપરાંત સ્ટીલ, એલ્યુમિનિયમ, ફુટવેર, બટેટા, સંતરા વગેરે પ્રોડક્ટના લોકલ મેન્યુફેક્ચરિંગને ઇન્સેન્ટિવ આપવાની પણ તૈયારી થઈ રહી છે.

વાણિજ્ય વિભાગે તૈયાર કર્યું લિસ્ટ

સરકાર તરફથી એવા ઉત્પાદકોની લિસ્ટ તૈયાર કરવામા આવી છે જેના સ્વદેશી ઉત્પાદનને પ્રોત્સાહન આપવામાં આવશે. તેમાં લિથિયમ આયન બેટરી, એન્ટિબાયોટિક્સ, પેટ્રોકેમિકલ્સ, ઓટો અને મોબાઈલ પાર્ટ્સ, રમત-ગમતના સાધનો, ટીવી સેટ, સોલાર સાધનો, ઈલેક્ટ્રોનિક સર્કિટ્સ વગેરે સામેલ છે.

આ રીતે રેગ્યુલેટ થાય છે ઇમ્પોર્ટ

ઇમ્પોર્ટને કંટ્રોલ કરવાના અનેક પ્રકાર હોય છે. ક્યારેક કસ્ટમ ડ્યુટી વધારી દેવામાં આવે છે. તો ક્યારેક ટેક્નિકલ કારણોમાં પ્રોડક્ટને અટકાવી દેવામાં આવે છે. લાઈસન્સિંગ પણ એક ટેક્નિકલ પ્રકાર જ છે. જેના દ્વારા કેટલાક દેશોમાંથી જ જે તે વસ્તુ ઇમ્પોર્ટ કરવાની મંજૂરી આપવામાં આવી શકે છે. સાથે જ જે પણ પ્રોડક્ટ આવે તેની એન્ટ્રી પર નજર રહે છે.