ટિકટોક પર પ્રતિબંધથી આ દેશી એપની ચાંદી-ચાંદી, 5 લાખથી વધુ વખત ડાઉનલોડ થઈ

ટિકટોક પર પ્રતિબંધથી ભારતીય એપને ચાંદી-ચાંદી

ચાઈનીઝ એપ્લિકેશન TikTok પર પ્રતિબંધથી ભારતીય એપ્લિકેશન ‘ચિંગારી’ની કિસ્મત બદલાઈ ગઈ છે. આ એપ્લિકેશનને 72 કલાકમાં લગભગ 5 લાખ વખત ડાઉનલોડ કરવામાં આવી છે. આનંદ મહિન્દ્રા અને કેન્દ્ર સરકારના પ્રિન્સિપલ ઈકોનોમિક એડવાઈઝર સંજીવ સાન્યાલ જેવા દિગ્ગજ તેને એન્ડોર્સ કરી રહ્યા છે.

સરકારે 59 ચાઈનીઝ એપ પ્રતિબંધિત કરી

સરકારે ટિકટોક જેવી ચીનની 59 એપ્લિકેશન પર સુરક્ષાનું કારણ આપતા પ્રતિબંધ લગાવી દીધો છે. આ બાદ ઘણા લોકો તેના ભારતીય અને અન્ય ઓપ્શન શોધી રહ્યા છે. મહિન્દ્રા ગ્રુપના ચેરમેન આનંદ મહિન્દ્રા અને કેન્દ્ર સરકારના પ્રિન્સિપાલ ઈકોનોમિક એડવાઈઝર સંજીવ સાન્યાલે ટ્વીટ કરીને દેશી સોશિયલ મીડિયા એપ ‘ચિંગારી’ની પ્રશંસા કરતા તેને ભારતની ‘ટિકટોક’ બતાવી છે.

શું કહ્યું આનંદ મહિન્દ્રાએ

દિગ્ગજ ઉદ્યોગપતિ આનંદ મહિન્દ્રાએ ટ્વીટ કરીને કહ્યું કે, મેં ટિકટોક ક્યારેય ડાઉનલોડ નથી કરી, પરંતુ આજે મેં ચિંગારી ડાઉનલોડ કરી છે. તમને વધારે તાકાત મળે.

શું છે એપની ખાસિયત

આ એપની શરૂઆત બેંગલુરુમાં સુમિત ઘોસ અને બિશ્વાત્મા નાયક દ્વારા સ્થાપિત સ્ટાર્ટઅપે કરી છે. આ એપને અત્યાર સુધી 25 લાખ વખત ડાઉનલોડ કરાઈ છે. તેમાં હિન્દી-અંગ્રેજી સહિત 9 ભાષાઓમાં ઈન્ટરફેસ છે. હવે આ બંને ‘ચિંગારી’ એપને ‘ભારત’માં બદલવાની તૈયારી કરી રહ્યા છે. ચિંગારી એપ્લિકેશન વર્ષ 2018થી જ પ્લે સ્ટોર પર છે. તે મુખ્ય રીતે 18થી 24 વર્ષના યુવાનો વચ્ચે લોકપ્રિય છે અને તેનું 90 ટકા ડાઉનલોડ પણ ભારતમાં જ થયું છે.