કોરોના કેસમાં ભારત દુનિયામાં ત્રીજા નંબરે, રવિવારે નવા કેસનો આંકડો 25,000ની એકદમ નજીક પહોંચ્યો

નવી દિલ્હીઃ દુનિયામાં કોરોના વાયરસના સૌથી વધુ કેસ ધરાવતા ટોપ-3 દેશોમાં ભારત ત્રીજા નંબરે પહોંચી ગયો છે. રવિવારે ભારતે રશિયાને પાછળ છોડી દીધું છે. આ સાથે દેશમાં 25,000ની નજીક કોરોના વાયરસના નવા કેસ નોંધાયા છે. જ્યારે વધુ 421 લોકોના મોત સાથે જૂન મહિનાના પાંચ દિવસમાં 2,300 કરતા વધારે લોકોના મોત થઈ ગયા છે.

રાજ્ય સરકારો તરફથી પ્રાપ્ત થયેલા આંકડા પ્રમાણે ભારતમાં કોરોના વાયરસનો કુલ આંકડો 6,97,887 થઈ ગયો છે. જુલાઈના 5 દિવસમાં 1 લાખ કરતા વધારે કેસ નોંધાઈ ગયા છે. નવા કેસ અને કોરોનાથી મોતના આંકડામાં આ મહિનો સૌથી ખરાબ સાબિત થઈ રહ્યો છે. વર્લ્ડોમીટર વેબસાઈટ મુજબ રશિયામાં કુલ કેસનો આંકડો 6,81,251 છે. આ સાથે અમેરિકા, બ્રાઝીલ બાદ કોરોના વાયરસના સૌથી વધુ કેસમાં ભારત ત્રીજા નંબરે પહોંચ્યું છે અને આ પછી રશિયાનો નંબર આવે છે.

ભારતમાં રવિવારે 24,912 નવા કેસ નોંધાયા છે, ભારતમાં જુલાઈના 5 દિવસમાં 1 લાખ કરતા વધારે નવા કેસ નોંધાઈ ગયા છે. પાછલા ચાર દિવસમાં નવા કેસોના રેકોર્ડ તૂટી રહ્યા છે. 2 જુલાઈના દિવસે 22,045 કેસ નોંધાયા હતા.

આ સાથે આસામમાં 1,202, ઉત્તરપ્રદેશમાં 1,155 કેસ સાથે પહેલી વખત આ રાજ્યોમાં 1000ની ઉપર આંકડો ગયો છે. જ્યારે રવિવારે 7 રાજ્યોમાં પહેલીવાર કોરોનાના પોઝિટિવ કેસનો આંકડો 4 આંકડામાં નોંધાયો છે. મહારાષ્ટ્રમાં સૌથી વધારે 6,555 કેસ નોંધાયા જ્યારે શનિવારે 7000 કરતા વધારે કેસ નોંધાયા હતા.

આસામ અને ઉત્તરપ્રદેશ સિવાય કર્ણાટકમાં 1,925, આંધ્રપ્રદેશમાં 998, પશ્ચિમ બંગાળમાં 895, ગુજરાતમાં 725 અને રાજસ્થાનમાં 632 કેસ રવિવારે નોંધાયા છે.

‘કોરોના અંગે સૌથી પહેલું એલર્ટ અમે આપ્યું ચીને નહીં’: WHOનો દાવો

ગુજરાતમાં 24 કલાકમાં રવિવારે 5 વાગ્યા સુધીમાં 725 કેસોનો ઉછાળો નોંધાયો, આ પાછલા 6 દિવસમાં નોંધાયેલા કેસમાં સૌથી વધુ હતા. રાજ્યમાં કુલ કેસનો આંકડો 36,123 થયો છે. પાછલા સાત દિવસમાં નોંધાયેલા કેસમાં 16%નો ઉછાળો નોંધાયો છે. પાછલા અઠવાડિયામાં 4,726 કેસ નોંધાયા એટલે કે રોજના સરેરાશ 675 નોંધાતા હતા- આ ટોટલ કેસના 13% કેસ છે.

રાજ્યમાં કોરોનાથી 18નાં મોત નોંધાયા, જેની સાથે કુલ મૃત્યુઆંક 1945 થયો છે. રવિવારે અમદાવાદમાં 9 અને સુરતમાં 6 લોકોના કોરોના વાયરસથી મોત થઈ ગયા, જ્યારે ગાંધીનગર, જામનગર અને ખેડામાં 1-1 મોત નોંધાયા.