કોરોનાઃ ઘરે જવા માટે 20 વર્ષના વિદ્યાર્થીએ 3200KM સાયકલ ચલાવી

48 દિવસમાં બ્રિટનથી ગ્રીસ પહોંચ્યો

કોરોના વાયરસને કારણે લોકડાઉન જાહેર કરવામાં આવ્યું .ઘણા દેશોમાં પબ્લિક ટ્રાન્સપોર્ટ, ફલાઈટ્સ વગેરે બંધ કરી દેવામાં આવ્યું હોવાથી લોકો જ્યાં હતા ત્યાં જ ફસાઈ ગયા. આ સ્થિતિમાં ભારતમાં પણ ઘણા શ્રમિકો ચાલતા અથવા તો સાયકલ લઈને પોતાના વતન પહોંચ્યા હતા. આવો જ એક સ્ટુડન્ટ છે Kleon Papadimitriou જેણે ઘરે પહોંચવા માટે 3200 કિમીથી વધારે અંતરની મુસાફરી કરી.

કોરોનાને કારણે ફસાયો હતો

Kleon, સ્કોટલેન્ડની ‘યૂનિવર્સિટી ઓફ એબરડીન’માં અભ્યાસ કરતો હતો. જ્યારે માર્ચ મહિમાં બ્રિટનમાં લોકડાઉન થયું તો તેણે પોતાના ઘરે ગ્રીસ જવાનો નિર્ણય કર્યો પરંતુ ફ્લાઈટ્સ બંધ હતી. એવામાં Kleonએ ઉત્તરી સ્કોટલેન્ડથી ગ્રીસ સુધી સાયકલ લઈને જવાનો નિર્ણય કર્યો અને 48 દિવસમાં 2000 માઈલ્સ (3200 કિમીથી વધારે) સાયકલ ચલાવીને પોતાના પરિવાર પાસે પહોંચ્યો.

10 મે ના રોજ બ્રિટનથી નીકળ્યો હતો

20 વર્ષના આ યુવકનો પરિવાર ગ્રીસની રાજધાની એથેન્સ પાસે મેલિસિયામાં રહે છે. લોકડાઉન થયું તો તેણે વિમાન સેવા શરૂ થવાની રાહ જોઈ આખરે 10 મેના રોજ એક સાયકલ લીધી અને સાથે ટેન્ટ, થોડું ખાવાનુ લઈને પોતાના ઘર તરફ નીકળી પડ્યો.

7 અઠવાડિયા બાદ ઘરે પહોંચ્યો

સૌથી પહેલા kleonએ હોલેન્ડ સુધી ફેરી લીધી. ત્યાર બાદ જર્મની, ઓસ્ટ્રિયા અને ઈટલી થઈને ગ્રીસ પહોંચ્યો અને ત્યા ફરી પેટ્રાસ માટે એક વધુ ફેરી લીધી. લગભગ 7 અઠવાડિયા બાદ એથેન્સ પહોંચ્યો.

પરિવારે કર્યું જોરદાર સ્વાગત

મુસાફરી દરમિયાન તેણે ટેન્ટમાં રાત પસાર કરી. ખાવામાં બ્રેડ, પીનટ બટર પર નિર્ભર રહ્યો. જ્યારે તે ઘરે પહોંચ્યો તો પરિવારજનોએ ઉષ્માભર્યું સ્વાગત કર્યું.