પબજી રમવામાં દીકરાએ ખાતામાંથી 16 લાખ ઉડાવી માર્યા, પિતાએ ગેરેજમાં કામે બેસાડ્યો

પબજી રમવા દીકરાએ 16 લાખ ઉડાવી માર્યા

ભારત સરકારે 59 ચાઈનીઝ એપ્સ પર પ્રતિબંધ લગાવી દીધો છે. જોકે આ લિસ્ટમાં ટિકટોક બાદ ભારતમાં સૌથી વધારે લોકપ્રિય પબજી એપ્લિકેશનનું નામ નથી. પરતુ સોશિયલ મીડિયા પર તેને પણ પ્રતિબંધિત કરવાની માગણી ઉઠી રહી છે. પબજી પર પ્રતિબંધ લગાવવાની માગણી પાછળ ચાઈનીઝ કનેક્શન કારણ નથી, પરંતુ ગેમ પાછળ પાગલ લોકોની સંખ્યા સતત વધવાના કારણે આ માગણી કરાઈ રહી છે. તમને જાણીને હેરાની થશે કે પબજી મોબાઈલ રમવામાં એક 17 વર્ષના છોકરાએ પોતાના પિતાના બેંક એકાઉન્ટમાંથી 16 લાખ રૂપિયા ઉડાવી માર્યા. આ ઘટના પંજાબના ખરરની છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

પિતાએ ગેરેજ પર કામે બેસાડ્યો

ધ ટ્રિબ્યૂન સાથે વાતચીત કરતા છોકરાના પિતાએ જણાવ્યું, ‘હવે અમે તેને ઘરમાં બેકાર નહીં બેસવા દઈએ અને ના તેને અભ્યાસ માટે મોબાઈલ અપાશે. હવે તે ગેરેજમાં કામ કરે છે. જેથી તેને ખબર પડે કે પૈસા કમાવવા કેટલા મુશ્કેલ છે.’ તેમણે કહ્યું કે, જે પૈસાને પબજી ગેમના ચક્કરમાં દીકરાએ ઉડાવી દીધા તેને તેમણે પોતાના સારવાર અને દીકરાના ભવિષ્ય માટે બચાવીને રાખ્યા હતા. હવે તેમને સમજાઈ નથી રહ્યું કે તેઓ શું કરે.

ગેમનું એકાઉન્ટ એપગ્રેડ કરવા ખર્ચ કર્યા રૂપિયા

રિપોર્ટ મુજબ, છોકરાએ પોતાનું તથા મિત્રોના પબજી એકાઉન્ટને અપગ્રેડ કરવામાં આ પૈસા ખર્ચ કર્યા. પરિવારને બેંક સ્ટેટમેન્ટથી આ પૈસા ખર્ચ થવાની જાણકારી મળી હતી. છોકરાના પિતા એક સરકારી કર્મચારી છે અને તેમને સ્વાસ્થ્ય સંબંધી સમસ્યા રહી ચૂકી છે. તેમણે જણાવ્યું કે, તેઓ ઘરથી દૂર નોકરી કરે છે અને તેમનો દીકરો પોતાની માતા સાથે ગામમાં રહે છે. તેણે તમામ ટ્રાન્ઝેક્શન પોતાની માતાના ફોનથી કર્યા છે.

માતાના ફોનમાંથી કરતો ટ્રાન્ઝેક્શન

રિપોર્ટમાં આગળ કહેવાયું છે કે ઘરના લોકોને છેતરવા માટે તે એક મોબાઈલ રિપેરિંગની દુકાન પર કામ કરવા જતો હતો, જ્યાં તે આખો દિવસ ગેમ રમતો હતો. માતાના ફોનમાંથી ટ્રાન્ઝેક્શન કર્યા બાદ દીકરો મેસેજ ડિલીટ કરી દેતો હતો. ઉપરાંત ઝીરો બેલેન્સની સમસ્યા ન થાય તે માટે તે એક એકાઉન્ટથી બીજા એકાઉન્ટમાં બેલેન્સ ટ્રાન્સફર કરતો. ગેમના ચક્કરમાં તેણે પોતાનું બેંક એકાઉન્ટ અને માતાનું PF એકાઉન્ટ પણ સાફ કરી નાખ્યું હતું.