હવે ખાનગી કંપનીઓ ચલાવી શકશે પેસેન્જર ટ્રેન, દેશના 109 રૂટ માટે મંગાવી પ્રપોઝલ

નવી દિલ્હીઃ રેલ મંત્રાલયે 109 રૂટ પર પ્રાઈવેટ ટ્રેન ચલાવવા માટે રિક્વેસ્ટ ફોર ક્વોલિફિકેશન(RFQ) મંગાવ્યું છે. સમગ્ર દેશમાં રેલવે નેટવર્કને 12 ક્લસ્ટર્સમાં વહેચવામાં આવ્યું છે અને તેમાં 109 રૂટમાં પ્રાઈવેટ ટ્રેન ચાલશે. દરેક ટ્રેનમાં ઓછામાં ઓછા 16 કોચ હશે અને આ ટ્રેન મહત્તમ 160 કિમી પ્રતિ કલાકની ઝડપે દોડશે. આ ટ્રેનોનો રોલિંગ સ્ટોક ખાનગી કંપની ખરીદશે. મેઈન્ટેનન્સ પણ તેમનું જ હશે રેલવે માત્ર ડ્રાઈવર્સ અને ગાર્ડ આપશે.

30 હજાર કરોડનું પ્રાઈવેટ ઈન્વેસ્ટમેન્ટ
શરૂઆતમાં આ કામ માટે પ્રાઈવેટ સેક્ટર ઈન્વેસ્ટમેન્ટનો 30 હજાર કરોડ રૂપિયાનો ટારગેટ રાખ્યો છે. આ ભારતીય રેલવે નેટવર્ક પર પેસેન્જર ટ્રેન ચલાવવા માટેના રોકાણની શરૂઆત છે.

મોર્ડન ટેક્નોલોજીને લાગુ કરવામાં આવશે
મોર્ડન ટેક્નોલોજીનો ઉપયોગ કરી મેન્ટેન્સ ઘટાડવાનો ઉદ્દેશ છે. જેનાથી ટ્રાન્ઝિસ્ટ ટાઈમમાં ઘટાડો આવશે. રોજગારની નવી તકો મળશે, સુરક્ષામાં વધારો અને મુસાફરોને વર્લ્ડ ક્લાસ મુસાફરીનો અનુભવ થશે.

મેક ઈન ઈન્ડિયા અંતર્ગત થશે નિર્માણ
તમામ ટ્રેન મેક ઈન ઈન્ડિયા અંતર્ગત ભારતમાં જ બનશે. જે કંપનીઓને તક મળશે તેમના પર ખરીદ, સંચાલન અને સાચવણીની જવાબદારી રહેશે. ટ્રેનની સ્પીડ 160 કિલોમીટર પ્રતિ કલાક સુધી વધારી શકાશે. આ કંપનીઓને 35 વર્ષ સુધી આ કોન્ટ્રાક્ટ આપવામાં આવશે.