Maruti Suzukiની નવી સ્કીમ, હવે લીઝ પર લો કાર

મારુતિ સુઝુકીએ શરૂ કરી નવી કાર લીઝ સર્વિસ

નવી દિલ્હી: મારુતિ સુઝુકીએ ગુરુવારે નવી કાર લીઝ સર્વિસની જાહેરાત કરી છે. તેને મારુતિ સુઝુકી સબ્સક્રાઈબ નામે લોન્ચ કરી છે. મારુતિની આ નવી સર્વિસ જાપાનની કંપની Orixની સાથે પાર્ટનરશિપમાં શરૂ કરી છે. નવી લીઝિંગ સર્વિસ મારુતિની જૂની લીઝિંગ સર્વિસ કરતા અલગ છે, કેમકે તે કોર્પોરેટ ક્લાયન્ટને બદલે વ્યક્તિગત ગ્રાહકો માટે છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial

શું છે મારુતિ સુઝુકીની સબ્સક્રાઈબ સર્વિસ?

આ નવી સર્વિસ અંતર્ગત કોઈપણ ગ્રાહક મારુતિ સુઝુકીની નવી કારને લીઝ પર લઈ શકાય છે. કંપનીએ 24 મહિના, 36 મહિના અને 48 મહિના સુધીની લીઝના ઓપ્શન આપ્યા છે. એટલું જ નહીં, જો ગ્રાહક પસંદ કરેલા લીઝ ટેન્યોર પછી પણ કારને લીઝ પર રાખવા ઈચ્છે છે તો ટેન્યોર પુરો થવાના 30 દિવસ પહેલા લેખિતમાં રિક્વેસ્ટ મોકલવાની રહેશે.

લીઝ ટેન્યોર દરમિયાન ગ્રાહકે દર મહિને ફિક્સ મંથલી ચાર્જ આપવો પડશે. તેમાં કારનું મેન્ટેનન્સ અને ઈન્શ્યોરન્સ સામેલ છે. કાર લીઝ પર લેવા માટે કોઈ ડાઉનપેમેન્ટ આપવું નહીં પડે.

કઈ રીતે લીઝ પર લઈ શકશો કાર?

કોઈપણ સબ્સક્રિપ્શન કે લીઝિંગ સર્વિસની જેમ મારુતિ સુઝુકી સબ્સક્રાઈબમાં પણ તમારે કાર, તેના વેરિયન્ટ અને લીઝ ટેન્યોર પસંદ કરી જરૂરી ફોર્મ ભરવાનું રહેશે. એપ્લિકેશન અપ્રૂવ થયા બાદ બુકિંગના 15 દિવસની અંદર તમને પસંદ કરેલી કાર મળી જશે. જોકે, તે કારની ઉપલબ્ધતા પર નિર્ભર કરે છે. કારની ડિલિવરી મળ્યા બાદ તમે મેન્ટેનન્સ, સર્વિસ અને ઈન્શ્યોરન્સ સહિત અન્ય સર્વિસ માટે ક્લેમ કરી શકો છો.

શું લીઝનો સમય પૂરો થયા પહેલા પાછી આપી શકાશે કાર?

દરેક લોન ટેન્યોરની સાથે લોક-ઈન પીરિયડ છે. 24 મહિના માટે 12 મહિનાનો લોક-ઈન પીરિયડ, 36 મહિના માટે 18 મહિના અને 48 મહિના માટે 24 મહિનાનો લોક-ઈન પીરિયડ છે. જો તમે લોક-ઈન પીરિયડ પૂરો થયા પહેલા કાર પાછી આપવા ઈચ્છો છો, તો બાકી બચેલા મહિના અને તેની સાથે 3 મહિનાની વધારાની ચૂકવણી કરવી પડશે. તેમજ, જો તમે લોક-ઈન પીરિયડ પછી કાર પાછી આપી રહ્યા છો, તો તમારે 1-3 મહિનાની વચ્ચે ચૂકવણી કરવી પડશે.

લીઝ પર લઈ શકો છો કઈ કાર?

મારુતિ સુઝુકી સબ્સક્રાઈબ સ્કીમ અંતર્ગત સ્વિફ્ટ, ડિઝાયર, બલેનો, બ્રેઝા, સિયાઝ, XL6 અને અર્ટિગાને તમે લીઝ પર લઈ શકો છો. બધી કારો નવી મળશે.

ક્યાં મળશે આ સર્વિસ?

મારુતિએ હાલ આ લીઝ સર્વિસ પાઈલોટ પ્રોજેક્ટ તરીકે શરૂ કરી છે. હાલમાં આ સર્વિસ બેંગલુરુ અને ગુરુગ્રામમાં ઉપલબ્ધ છે.