અ’વાદઃ એકતરફી પ્રેમમાં પાગલ યુવક યુવતીના ઘર સુધી પહોંચી ગયો, પછી…

કોરોના વાયરસના કારણે લાગુ કરાયેલા લોકડાઉન વખતે લોકોના ઘરથી બહાર નીકળવા પર પ્રતિબંધ હતો. એવામાં પ્રેમીઓ માટે એકબીજાથી દૂર રહેવું ખૂબ મુશ્કેલ બન્યું હોય તેમ લાગી રહ્યું છે. આવો જ એક કિસ્સો શહેરના વેજલપુરમાં સામે આવ્યો છે. જેમાં એકતરફી પ્રેમ પાગલ યુવક મહિનાઓ સુધી છોકરીને ન મળી શકતા તેના ઘર સુધી પહોંચી ગયો હતો. જ્યાં તેણે પોતાના પ્રેમનો એકરાર કર્યો અને જો તેને યુવતી સાથે મુલાકાત નહીં કરવા દેવાય તો હાથની નસ કાપવાની ધમકી આપી દીધી.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

આ યુવતીને કોરોનાનું સંક્રમણ લાગ્યું છે. જ્યારે તેનો પરિવાર પણ હોમ ક્વોરન્ટાઈનમાં છે. તેમણે છોકરાને ઘણો સમજાવવાનો પ્રયાસ કર્યો પરંતુ યુવક ન માન્યો આખરે યુવતીની માતાએ મદદ માટે પોલીસને ફોન કરીને બોલાવવી પડી.

ઘટનાની જાણકારી મુજબ, બહેરામપુરામાં રહેતા છોકરીના મોટા ભાઈ રામ નટુભાઈએ રખિયાલના આરોપી યુવક નયન મકવાણા વિરુદ્ધ વેજલપુર પોલીસમાં ફરિયાદ નોંધાવી છે. રામની માતા અને 21 વર્ષની નાની બહેન વેજલપુરના શ્રીનંદનગર વિભાગ-3માં રહે છે.

આંબાવાડીમાં પ્રાઈવેટ કંપનીમાં સેલ્સ એક્ઝિક્યુટિવ તરીકે નોકરી કરતા રામને મંગળવારે બપોરે તેની માતાએ ફોન કરીને તરત જ ઘર પર આવવા કહ્યું. માતાએ તેને કહ્યું કે, નયન બપોરે 1 વાગ્યે તેમના ઘરના દરવાજે આવ્યો છે.

રામે પોલીસને જણાવ્યું કે, ‘જ્યારે દરવાજો ખોલ્યો તો નયને મારી નાની બહેન ક્યાં છે તેમ પૂછ્યું હતું. તે તેને મળવાનો આગ્રહ કરવા લાગ્યો. જ્યારે મારી માતાએ તેને કહ્યું કે, મારી બહેન ક્વોરન્ટાઈનમાં છે તો તે ગુસ્સે થઈ ગયો. તેણે કહ્યું કે તે મારી બહેન સાથે લગ્ન કરવા માગે છે અને તેની સાથે વાત નહીં થવા પર હાથની નસ કાપવાની ધમકી આપી. જ્યારે મારી માતાએ પોલીસને ફોન કર્યો તો તે ત્યાંથી જતો રહ્યો.’

વેજલપુર ઈન્સ્પેક્ટર એલ.ડી ઓડેદરાએ કહ્યું, યુવતીના ભાઈ મુજબ, આ એકતરફી પ્રેમનો કિસ્સો છે. ફરિયાદીની બહેન અને આરોપી બંને સાથે કોલેજમાં અભ્યાસ કરે છે, અને આમ તેઓ એકબીજાને ઓળખે છે. અમે સ્થળ પર અને આજુબાજુના વિસ્તારના સીસીટીવી ફૂટેજ ચેક કરી રહ્યા છીએ. અમે આ મામલા પાછળની વધારે માહિતી મેળવવા માટે પ્રયાસ કરી રહ્યા છીએ.