લોકડાઉનનો ભંગ કરી પરિવાર સાથે બીચ પર જનારા ન્યૂઝીલેન્ડના સ્વાસ્થ્ય મંત્રીએ રાજીનામું આપ્યું

ન્યૂઝીલેન્ડના સ્વાસ્થ્ય મંત્રીનું રાજીનામું

કોરોના મુક્ત થવાની જાહેરાત કર્યા બાદ ન્યૂઝીલેન્ડમાં એક  મોટી બેદરકારી સામે આવી છે. હકીકતમાં અહીં એક ક્વોરન્ટાઈન સેન્ટરમાં કેટલાક દિવસો પહેલા કોરોનાના મામલા સામે આવ્યા હતા. ક્વોરન્ટાઈન સેન્ટરની સુરક્ષામાં ચૂક થઈ હતી. આ ચૂક બાદ ન્યૂઝીલેન્ડના સ્વાસ્થ્ય મંત્રી ડેવિડ ક્લાર્કે રાજીનામું આપી દીધું છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

લોકડાઉનમાં પરિવાર સાથે બીચ પર ફરવા ગયા હતા

રિપોર્ટ મુજબ, ડેવિડ ક્લાર્કે કોરોનાને લઈને સરકારની પ્રતિક્રિયા અને લોકડાઉનના નિયમોના ઉલ્લંઘન કરવા પર નિંદાનો સામનો કર્યા બાદ રાજીનામું આપી દીધું. તેઓ લોકડાઉન દરમિયાન પોતાના પરિવાર સાથે બીચ પર ગયા હતા. ન્યૂઝીલેન્ડના રાષ્ટ્રપ્રમુખ જેસિન્ડા અર્ડર્ને ગુરુવારે ડેવિડ ક્લાર્કના રાજીનામાની જાહેરાત કરી હતી.

જૂનમાં ન્યૂઝીલેન્ડે કરી હતી કોરોના મુક્તની જાહેરાત

રાષ્ટ્રપ્રમુખ જેસિન્ડા એર્ડર્ને પહેલા ડેવિડ ક્લાર્કને હટાવવાથી ઈનકાર કર્યો હતો અને કહ્યું હતું કે દેશમાં કોરોનાને રોકવામાં ડેવિડ ક્લાર્કે મહત્વપૂર્ણ ભૂમિકા ભજવી છે. જોકે હવે રાષ્ટ્રપ્રમુખ જેસિન્ડાએ કહ્યું કે, તેઓ ક્લાર્કના નિર્ણય સાથે સહમત છે. જેસિન્ડા અર્ડર્ને જૂનની શરૂઆતમાં જ ન્યૂઝીલેન્ડને કોરોનામુક્ત જાહેર કરી દીધો હતો.

ફરી આવ્યા કોરોનાના કેસ

જોકે ન્યૂઝીલેન્ડ કોરોનામુક્ત થયાના થોડા જ દિવસો બાદ બ્રિટનથી પાછી આવેલી બે મહિલાઓ કોરોના પોઝિટિવ મળી આવી હતી. બંને મહિલઓને બાદમાં ક્વોરન્ટાઈન સેન્ટરમાં મોકલી દેવાઈ. હાલમાં ન્યૂઝીલેન્ડમાં કોરોનાના કુલ 22 કેસ એક્ટિવ છે. જે અલગ-અલગ દેશોમાંથી આવેલા છે.